متن نوحه ترکی از حاج حسن یعقوبی
مجموعه اشعار برگزیده آیینی و مذهبی حاج حسن یعقوبی در مدح و رثای اهلبیت علیهم السلام ، متن نوحه ترکی از حاج حسن یعقوبی
---------
زبانحال فاطمه عروس به جناب قاسم (علیه السلام)
اللرینده ظلمیله قان اولان طویدا طوی حناسی عم اوغلی جان
گر آچیلسا آچ قانلی گوزلرون گوزلریم ضیاسی عم اوغلی جان
هر بلا و درو و غمی منه کلک اقتضا ایلیوب نصیب
باغ عمریمه جور و ظلمیله صرصر خزان و ستم اَسیب
تازه کدخدانی گوروبدی کیم نوعروسه قربان عدو کسیب
سن کیمی فدانون گرک اولا کربلا مناسی عم اوغلی جان
شعلهء شرار غمونده من هر زمان گرک سینه داغلیم
بیر دگول اقلّی یاران سنون زلف مشک سائیله باغلیم
بولمورم سنه یا اوز حالیمه شوریله ایدم ناله آغلیم
نوعروسیون اولدی ظلمیله قاره طوی لباسی عم اوغلی جان
نوعروسی گورماقه رسمیدور حجله گاهه قیزلار هامی گلر
دسته دسته شادی ایچون گلوب اللرینده گُل باشینه سپر
منده عکس اولوبدور ولی بو ایش هر گلن یوزه گوزیاشین الر
ایلییَر نوا حالیمی پوزار ناله و نواسی عم اوغلی جان
باشون اوسته آچ گوزلریوی گور ایمدی من نه احواله قالمیشام
لاله تک بو داغلی دله سنون یاروی گوروب داغ آلمیشام
قرمزی اولار شال نوعروس من ولی باشا قاره سالمیشام
باشدا واردی سندن ازل علی قارداشیم قراسی عم اوغلی جان
اوزگه فرض ایدورسن عم اوغلی جان گوزلریوه من گلمورم تانیش
نعشیوی کناره آلام گرک باخماسا آنان گیتمیم یانیش
قوی سیلیم قانون قانلی لبلرون حالیمی سوروش منله بیر دانیش
غملی قلبیمین محنتین آزات من دلون فداسی عم اوغلی جان
سن عموم حسن یادگارسان هم بابام حسین جان نثاری سان
ناز ایلمه اوتلی قلبیمین طاقت و توان و قراری سان
عمه لر آنان باجیلاریون نور دیدهء اشک باری سان
آل حیدرین تک به تک گیدوب قلبینین قواسی عم اوغلی جان
ایلورم نظاره وجودیوه زخم تیغ تیزیله یاره دی
جلدسیز دوشوب گوئیا یره مصحف خدا پاره پاره دی
شرح ایدور فدک ماجراسینی پیکرون اونا استعاره دی
یاد ایدور بتولین قباله سین جسموون نماسی عم اوغلی جان
سرو تک گورنن فتاده بو قامتی قوپوبدور قیامتیم
اولموشام پریشان ز بس گیدوب دست غمده یغمایع طاقتیم
هر قدر گر عمر ایلسم اولار مین ایله برابر بو ساعتیم
تازه بیر بلایه سالوب باشیون بلاسی عم اوغلی جان
آسمان عشقیمده ای منیم ظلمیله باتان بختیم اولدوزی
من سنه منیم حالیمه ولی نالیه گلور مرتضی قیزی
معجریم قرادی دیمه دیور عمم ایله قانیله قرمزی
الده تا او معجر اولا سنه آغلاماق اساسی عم اوغلی جان
چوخ زماندی (یعقوبی) عجزیله یوز قویوب سنون بارگاهیوه
گوز تیکوب بو (محمودیله) سنون بیر عنایت گاه گاهیوه
سویلییَلّه قولیمجه هر زمان گلسلر اگر حجله گاهیوه
طوی اتاقی ای ظلمیله اولان محفل عزاسی عم اوغلی جان
استاد یعقوبی
منبع مجموعه کانالهای مدح و مرثیه
----------- متن اشعار حاج حسن یعقوبی ---------
غزل
اولیدی لطف خداوند حیّ سبحانی
نصیب ایدیدی جمال جمیل جانانی
گجه گونوز یانورام آتش فراقندا
همیشه شعله چکور دلده نار هجرانی
اوزی محبّتینی قلبیمه سالان گوندن
آخور عذاره سرشکیم چو ابر نیسانی
شعاع حسنی خجل ایلیوبدی مهر و مهی
سالوب تحیّره مصر ایچره ماه کنعانی
هلالی قاشلاری شهلا گوزی لب لعلی
سالوبدی حیرته رخساری کون و امکانی
جمالی شرح ایلوری آیه آیه قرآنی
گورن گرک اوخیا سورهء فتحنانی
می محبتیله مست ایدوب ایدن گوندن
ایدوب خرابه نشین مندن آلدی ایمانی
کمال لطفیله گر ایتمسه بو درده علاج
سالوب منی ایله بیر درده یوخدی درمانی
مسیح عشق دم گرمیله ویروبدی نفس
او بیر دمی ایلییَر زنده مین مسیحانی
گلنده سیز منی قربان کسون قدملرینه
گورن دیسون که بودا اولدی عشق قربانی
کسنده باشیمی سیز قویمیون چالوم ال ایاق
مباد قانه بویانسون نگار دامانی
نقدر سعی ایلورم لطف ایدوب ویره بیرده
آلام الیندن ایدم نوش جام صهبانی
دیون کنار ایده شبرنگ زلفونی یوزدن
گوزوم گوره او درخشنده ماه سیمانی
اماندی رحم ایله یعقوبیه شماتت اوتی
یاخوندی یاندورا، قویما یانا قوری جانی
استاد حاج حسن یعقوبی
منبع مجموعه کانالهای مدح و مرثیه
----------- متن اشعار حاج حسن یعقوبی ---------
غزل
یاریمین هجرینده دلدن قطره قطره قان گیدر
قالموشام رفتاریدن من گردش دوران گیدر
عالم رویاده گورَّم چوخ گجه رخسارینی
صبح اولاندا خانهء صبری ایدر ویران گیدر
قوش کیمی چولقار ایییلتیم اولدوقوم کاشانه نی
قونشولار جانه گلر ناله سسیم هر یان گیدر
شهر عشقی چوخ دولاندیم تاپمادیم بیر دادرس
بیر گمانیم دردیمه خالق ایده درمان گیدر
فکره غرق اولّام گورر اغیاریلر ریشخند ایدر
قلبیمین قانی گوزومدن هر زمان هر آن گیدر
عاشقه معشوقی ناز ایلر بو رسم عشقدور
آردیجا عاشق دوشر معشوقه سی هریان گیدر
اوز یریمده تک قویوب ایتدی منی خانه نشین
احتضار حالینده قالّام سوگیلی جانان گیدر
تیر مژگانین کمان ابرو آتوب بو قلبیمی
خانهء زنبور مثلی ایلییَر شان شان گیدر
هر گلن دانلور بو عشق اوسته من بیچاره نی
مین شماتتله پوزار احوالیمی صوندان گیدر
بولمیوب بولمز بیری یعقوبی نون اسرارینی
کوی و برزنده دوشوب علت ندور حیران گیدر
استاد یعقوبی
منبع مجموعه کانالهای مدح و مرثیه
----------- متن اشعار حاج حسن یعقوبی ---------
غزل
هنوز اشک تریم عارضه رواندی منیم
فراق یاریده قلبیم دولوبدی قاندی منیم
بو قلبیمین قانیدور عارضیمده اشک زلال
سولان عذاریمه باخسان سوزوم عیاندی منیم
جهان طبیب اولا دلد دریمه دوا بولمز
بو عشق دردی یانان قلبیده نهاندی منیم
رقیب طعنه سی ایل تهمتی قوشون مثلی
توکولدی اوستومه صبریم ایوی تالاندی منیم
خدنگ نازینی آتدی ایدوبدی قدّیمی دال
اوزوم قوجالمشام عشقیم ولی جواندی منیم
گَلر نگار اگر بیرده بخت یار اولسا
گورر رقیب یاتان بختیمی اویاندی منیم
ویرنده جان باشیم اوسته گلوب اوتورسون کاش
همیشه عمرده حسرت اولان او آندی منیم
بو عشقین اوسته گیدم داره اُف دیمرم
ایدن بو حالیمه غبطه قوجا جواندی منیم
مقام عشقده یعقوبیا دایان صبر ایت
دله گتیرمه غم اوسته غمیم قالاندی منیم
استاد یعقوبی
منبع مجموعه کانالهای مدح و مرثیه
----------- متن اشعار حاج حسن یعقوبی ---------
زبانحال حضرت رباب (سلام الله)
چخمور علّت ندی جسمینن علی جانی ربابین
عرشه اوج ایلری سندن سورا افغانی ربابین
گون قباقین اوزومه مسکن و ماوا ایلدیم من
هر نه عهدیم واریدی تک به تک ایفا ایلدیم من
مجلس عامیده فریادیله غوغا ایلدیم من
اهل مجلسدن آلوب طاقتی افغانی ربابین
آتاوین غملری بوکدی بلیمی بولمدی بیر کس
کیمسه فریاده گلنده سسیمه ویرمدی بیر سس
سایه وی سن باشیم اوستن من هاچان سویلمیشم کس
هجر اوتوندا یانوری بو دل سوزانی ربابین
اوچ گئجه اوچ گونوزی سوز عطشدن بالا یاندون
بوغازوندان دیوب اوخ قوش کیمی چرپندون اویاندون
آتاوین اللری اوستونده قزل قانه بویاندون
فدیه جانانه اولان ای قوزی قربانی ربابین
گلوری اهل مدینه قوجاقیندا سود اوشاقی
نظره آلمور علی جان آناوین بوشدی قوجاقی
شاخه گلدن اوچوب بلبلی خالیدی بوداقی
یانوری آتش هجره دل ویرانی ربابین
من گورن گونلری هیهات گوریدی بیر عزیزه
بختیمین چرخی منیلن عجب ایلوبدی ستیزه
گوردی قارداشلاریم اوغلوم منی اوخشاتدی کنیزه
عکسینه گردش ائدوب دوریده دورانی ربابین
آنانین اولمسه اوغلی آناوین دردینی بولمز
گوزونون یاشینی آخسا یوزونه غیر الی سیلمز
چوخ تعجبدی آنان صاق قالوب اوغلوم ندن اولمز
جسمنی ترک ایلمور راحت اولا جانی ربابین
نه جلالیم واریدی بیر گونون عرضینده یوخ اولدی
سنی مندن آییران دهریده اوغلوم بیر اوخ اولدی
باجوون دردی اورکده منه سندن ده چوخ اولدی
دردینه چاره ائده اولمادی امکانی ربابین
عمّوون حق گوروم ائتسون علی احسان ائوین آباد
گوزومون یاشی آخاندا الیردی اودا فریاد
خانه صبریمی غم سیلی یخوب ایلدی بر باد
گر اولوم گلسه اولار دردینه درمانی ربابین
من اوغول زوجه غمدیده سلطان حجیزم
او سببدندی علی جان ایکی دنیاده عزیزم
واردی فخریم بونا من زینب کبرایه کنیزم
آتاوا عمّوه قربان قورین جانی ربابین
سنه یعقوبی دیور شام و سحر درد نهانین
زر کیمی بوته غمده اریدیبدی دل و جانین
اجرینی لطفیله احسان ایله ناقص بو بیانین
نیّتی واردی اورکده اولا دربانی ربابین
حاج حسن یعقوبی
منبع مجموعه کانالهای مدح و مرثیه
----------- متن اشعار حاج حسن یعقوبی ---------
غزل
عطشاندی گویول بیر آلا پیمانه علیدن
خوش حالینه هر کس اولا مستانه علیدن
میخانهء عشقی دولانار عاشق اولانلار
بلکه آلا بیر باده و پیمانه علیدن
شمع رخونا عاشق اولانلار یاناجاقدور
پروانه کیمین یانماقا پروا، نه علیدن
کعبه اونولان تاپدی شرف لطف خدادن
کم قیمت اولوب دیریله بتخانه علیدن
مست می دلدار اولانلار باش اوجالدار
فخریله سمای حق منّانه علیدن
هو حق چاغیرار میکده ده یاری گورنده
شوره گلی خمخانه و میخانه علیدن
ماه رمضان ماه علی ماه خدا دور
یالوار یتسن عزّت شایانه علیدن
دامانینی دوت صدقیله بلکه آلاسان تئز
دارِیْن نجاتین، وور اوزین چانه علیدن
پروانه صفت طوف ایله اول شمع جمالی
اجرون آلاسان بلکه یانا یانه علیدن
یعقوبی اگر ایستیوسن ایسته براتین
زوّار اولاسان شاه شهیدانه علیدن
استاد حاج حسن یعقوبی
منبع مجموعه کانالهای مدح و مرثیه
----------- متن اشعار حاج حسن یعقوبی ---------
غزل
جمالون کعبه سینده طاق ابرو قبله گاهیمدور
دونه هجران وصاله راه وصلت شاهراهیمدور
او مهر حسنوی لوح دیلیمده نقش ایدوب مانی
گوروب صبحه کیمی یانّام اونا اشکیم گواهیمدور
مُجسَّم ایتمسم خورشید رخسارون خیالیمده
من بیچاریه زندان اولان اوز خوابگاهیمدور
ولی هانسی گئجه خلوت اولا سنله ایدم صحبت
گوزومده لیل دیجوروم کَأَنَّهْ صبحگاهیمدور
دانشسام هر کیمیله آتش آهیمله یاندرّام
بو قلبیم اوتلودور تاثیر ایدن بو سوز آهیمدور
گوزون قربانییم سیندیر اوزون گل بیر منه باش چک
داریخدیم، هجر اوتوندا یانماقیم اوز اشتباهیمدور
گذشت ائت گیچ قصوریمدن منی ایت لطفوه شامل
اَیاقون گوی گوزوم اوسته بولوم عفّو گناهیمدور
بلا و دردیله تخمیر اولوبدور روحیم اَزَّلدن
مصیبت حیطه سی ایلوم نه چاره زادگاهیمدور
پناه اول روز محشرده اوزون یعقوبیه شاها
بوله عالم پناهِ عالمِ امکان پناهیمدور
حاج حسن یعقوبی
منبع مجموعه کانالهای مدح و مرثیه
----------- متن اشعار حاج حسن یعقوبی ---------
احوالات دفن شهدای کربلا
امام ساجده امر ایتدی خالق بی چون
وجود شاه شهیدانی ایلسون مدفون
گلوبدی دشت غمه امر کردگاریله
بنی اسد ائلینی گوردی آه و زاریله
بلا چولون دولانوللا غمین و سرگردان
بو امره چاره تاپانموب ائدوله آه و فغان
بویوردی سید سجاد اولمیون محزون
منه کمک لیق ایدون، ایلیوم اوزوم مدفون
یتیشدی قتلگه ایچره عیان و بی پرده
گلوب دایاندی آتاسی یخلدیقی یرده
او کعبهء دلی اوّل طواف ائدیب محزون
گوتوردی اللری اوسته آلوب، اولوب دلخون
دیدی بو حنجریوه کیم قویوبدی خنجرینی
جفا الیله بابا کیم سویوبدی پیکریوی
اووپوبدی گل کیمی ایگلردی جسم یاره سینی
حصیره قویدی او دم نعش پاره پاره سینی
گیدوب تاپوب گتیروب اول ایکی گل ترینی
قویوبدی سینه سی اوسته کسیلمیش اللرینی
گینه بلا چولونون آختاراردی توپراقینی
تاپوب گتیردی فغانیله خیردا بارماقینی
قویوب مزاره حسینی گوزونده اشگ روان
باخوب وجودینه گویا ایدوب بو نوعی بیان
یات ای جنازه سی اوچ گون قوری یر اوسته قالان
یات ای عیالینی بو فرقتیله درده سالان
یات ای آناسینی جنّتده نالیه گتیرن
یات ای اوز عهدینی معشوقیله باشا یتیرن
یات ای خیامینی اشرار ایلین غارت
یات ای قیامی اولان کل عالمه عبرت
یات ای شرار جفائیله خیمه گاهی یانان
جفا الیله سولوب گلشنی، گلی سارالان
یات ای باشی کسیلن، ای بناتی غارت اولان
یات ای کرملی الی ساربان الینده قالان
یات ای باشی دالیدان ذبح اولان بابام لای لای
حنوطی خاک اولان غسلی قان بابام لای لای
باشی جدایه گئچن، نعشی اوسته آت چاپیلان
اَتی قانی سوموگی بوردا توپراقا قاتیلان
یات ای گئدن اوزوگی بارماقیلا یغمایه
قرآن کیمی داغیلان جسمی آیه به آیه
اجازه صادر ایله ای جهانیانه امیر
قالوبدی گونلر ایوینده یارالی طفل صغیر
گیدوم تاپوم گتیروم یاره وه سالوم مرهم
قویوم مزاریده راحت یاتون ایکیز باهم ...
دوروب ایاقه گوزینده سرشگی قانه دونوب
دیدی الهی بیزه گردش زمانه دونوب
بیر آز دولاندی او ساعت دیاری سرگردان
ساتاشدی گوزلرینه اوندا غنچهء خندان
آلوب قوجاقه دوداقین قویوبدی اوخ یرینه
قبیله اهلی ایدیب ناله، دگدی بیر بیرینه
دیدیله کیمدی بو غنچه بو نوعی پوزدی سنی
بیزیده نالیه گتدی بونون غم و محنی
اورکلنوبدی توکوب عارضه گوزیندن یاش
آناما سویگولی بو طفلدور منه قارداش
آتامون اللری اوستونده قانینه بویانوب
دگوب بوغازینه پیکان دیسگینوب اویانوب
بونون غمی هامی آل اللهه بیوک غم اولوب
اودور کی اشگیم آخور عارضیمده بیر یم اولوب
گلون سسیمه ویرون سس دیاخ اورکدن وای
آناسینون دیلیجه اوخشیاق دیاخ لای لای
دیاخ قانین سو یرینه ایچن بالام لای لای
قلج کیمی بوغازین اوخ بیچن بالام لای لای
آغ اونوگی بویانان قانه وای بالام لای لای
کنوز عشقیده دُردانه وای بالام لای لای
غم آتشی آقامون قلبینی آلیشدیردی
گتیردی سینه شاهنشهه یاپیشدیردی
بویوردی یات آتاوون سینه سینده ناز ایله
آنان فراقینه دوز آجّا سوز و ساز ایله
یات ای شرار عطشدن یانان دلی دوداقی
یات ای قانا بویانان ظلمیله الی ایاقی
یات ای آخان قانی عرش خدایه زیور یات
اولان خدنگیله غنچه زمانی پرپر یات
یات ای جنازه سی نیزه باشندا عرشه چیخان
شهید اولماقی، محکم بنای ظلمی یخان
یات ای آناسی دِین تشنه شیر خوارم یات
آی آردی، گون قاباقنجا آخان ستارم یات
یات ای گیدن علی اکبردن اوتری جنّاته
باشون دالیجا چکولّه ربابی شاماته
یات ای شرار عطشدن اَلولانان قارداش
غزال دشت خطن مثلی اُولانان قارداش
شرار غم اورگین یاندروب ایدوبدی کباب
یوزون بابا سینه دوتدی ایدوبدی بیله خطاب...
دیدی بابا ایلدیم من وصیّتون اجرا
اجازه ویر ایلیوم آیری محشری پیدا
دوزوبدی داشلاری تا اوستونه توکوب توپراق
گتیردی اکبری، یابن الحسن گوزیندن ایراق
اَیاق طرفده ده بیر قبر قازدی قارداشینا
باخوبدی قارداشینا اذن ویردی گوز یاشینا
اورکلنوب دیدی ایوای یارالی قارداش وای
خدنگ تیغیله جسمی یارالی قارداش وای
بویوردی وار یری اشگیله گوزلروز دولسون
کمک ایدین آتامون امری جابجا اولسون
مزاره دوشدی آلوب صاق طرفده قویدی یره
اگیلدی اوپدی بوغازین دله تسلی ویره
بویوردی یات یورولوبسان اولوم سنه قربان
گوروم اولا علی سندن صورا جهان ویران
یات ای جمالی شبیه رسول عالمیان
یات ای وجودی اولان یرده گل کیمی خندان
یات ای عزیز آتامون گوزلرینده نور بصر
یات ای تمام صفاتی پیمبره مظهر
یات ای آناسینی صحرالره سالان گریان
یات ای خلوصیله اوز دینینه اولان قربان
یات ای شهید اولان اوّلده آل حیدردن
قرار و صبر آپاران عترت پیمبردن
یات ای ازلده اولان مست جام صهبادن
یات ای مزاری اولان برتر عرش اعلادن
یات ای باباسی علی تک باشی اولان منشق
یات ای یارالی اولان جد پاکینه ملحق
او قدری آغلادی هوشدان گیدیب گلوب هوشه
توکوبدی توپراقی ایتدی او قبری شش گوشه
اُلونجه آغلیا بو محنت و غمه آزدی
مزاری اوستونه اسم مبارکین یازدی
بو قبر صاحبیدی نور ذات لم یزلی
سوسوز یارالی ویرن جان حسین اِبن علی
اورکده غملرینه ووردی بیر سرا پرده
هامی شهیدلری دفن ایدوبدی بیر یرده
اورکده دردینه بو دفن ایلدی درمان
حبیبی ده ایلدی اوز آتاسینه دربان
بیر آه چکدی دوباره بولوت کیمی دولدی
ایله فغان ایلدی کربلا چولی دولدی
دیدیله اهل قبیله ندن گوزون دولدی
خزان گلون مَثَلی رنگ صورتون سولدی
گلوب بیانه بویوردی بیله او اشرف ناس
فرات اوسته قالوب نعش حضرت عباس
عمومدی، مثلی اونون گلمیوبدی دنیایه
اونون نظیرینه هیهات گوی سالا سایه
فغان و ناله سی دوتدی او عرش مینانی
دولاندی تاپدی اولان قطعه قطعه اعضانی
یغوبدی بیر یره اول قطعه قطعه پیکرینی
گیدیب تاپوب گتیروبدور کسیلمیش اللرینی
بو فکردیدی یغا گوهری خزینه سینه
یارالی اللرینی گتدی قویدی سینه سینه
او سرو قامته بیر خیردا قبر ایدوب تعیین
او خردا قبریده مدفون ایدوب امام مبین
قویولدی قبره، توکوب توپراق ایلدی فریاد
دیدی خدا ایلسین ای عمو ایوین آباد
جنازه دفن اولوناندا آچاللا صاق یوزونی
گوروب کی یوخدی باشی دولدوروب ایکی گوزونی
بویوردی یات ای ایدن عشقی عالمی حیران
یات ای صداقتیله دینینه اولان قربان
یات ای جمالی ووران طعنه مهریله ماهه
یات ای نثار ایلین ثار، ثارِ اَللّهه
یات ای کمک سیز حسینون رشید علمداری
یات ای سپاه خدانین وفالی سرداری
یات ای عمو، بالاجا قبریوه جانیم قربان
بو قبر حشره کیمی شیعه نی قویار گریان
یات ای سو اوسته ایکی اللرین کسن دشمن
او اللروندی آلوب طاقتی عمو مندن
آنام بتولی او اللردی ایلین راضی
خدا او اللره محشر گونی اولار قاضی
بو اللرین بولونر قیمتی قیامتده
آنام الینده دوتار موقع شفاعتده
توکنده توپراقی قبر اوسته ایلدی فریاد
دیدی آناوین اولا ای عمو ایوی آباد
یازیلدی قبرینون اوسته بودور او اشجع ناس
بو قبر صاحیبدور یعنی حضرت عباس
گلوب ابوالفضل آدی اوت نهادیمه دوشدی
حسینی داده چاغیرماقی یادیمه دوشدی...
حاج حسن یعقوبی
منبع مجموعه کانالهای مدح و مرثیه
----------- متن اشعار حاج حسن یعقوبی ---------
زبانحال امام حسین (علیه السلام)
بعد از شهادت حضرت علی اصغر (ع)
خطاب به خواهرشان
گل دوتوب اوت اورگیم یاندی باجی
الیم اوسته بالام اوخلاندی باجی
جام صبرین باجی بیر اوخ جالادی
خانهٔ قلبیمی دشمن تالادی
اوخ دیوبدور بوغازین پارچالادی
یوز گوزی اُنوگی القاندی باجی
یاخشی قویدی سوزی میدان یرینه
نوش ائدوب قانینی درمان یرینه
اَمدی تیری باجی پستان یرینه
بولمدی زهرلی پیکاندی باجی
منی یاندیردی یانوب آغلاماقی
آتش آهه جگر داغلاماقی
گوزلریمدن گوزونی باغلاماقی
اورگیم اوت دوتوب اوتلاندی باجی
اتمیوب اوچ گئجه دور ناز ایله خواب
آناسین یاندروب ایتمیشدی کباب
یولونی گوزلوری بیچاره رباب
بولموری غنچه سی خنداندی باجی
آلدی مندن باجی بو حالی دوزوم
اوخ دگنده قالوب آغزیمدا سوزوم
خیمیه گلماقا گلموردی یوزوم
قارداشون حالی پریشاندی باجی
قالدی قونداقی الیمده باجی جان
قانلی میدانی دولاندم نگران
اولمادی قونداقنی مندن آلان
اوت دوتوب قلبیم الولاندی باجی
منی یاندردی ایله درد گران
یتیش امدادیمه ای روح روان
اوزون آل یاره سینی ویرمه نشان
آناسی سینه سی سوزاندی باجی
ظلمیله غنچه گلوم قانه باتوب
فانی دنیانی باجی گوزدن آتوب
یاتمیوب اوچ گئجه نی ایندی یاتوب
استراحت بونا الاندی باجی
کیم بولور قوم عدو نیله دیلر
ناقه صبری نجه پیله دیلر
ایستدیم سو بالامه ویرمدیلر
دیمیوبلر کی لب عطشاندی باجی
بو ستاره گون الی اوسته آخوب
قلب خورشیدی آخوب ناره یاخوب
اوخ دگنده منه حسرتله باخوب
گوزلریم حالینه گریاندی باجی
ماهین آردنجا ستاره دولانار
گور باتا آی او ستاره دایانار؟
اولارین حالینه خورشید یانار
حالیمه نه فلک اوتلاندی باجی
بسدی یعقوبی دولانما شرده
دینه اصغر آدنی هر یرده
دادوه بلکه یته محشرده
بیرده ده اصغریم اوخلاندی باجی
حاج حسن یعقوبی
منبع مجموعه کانالهای مدح و مرثیه
----------- متن اشعار حاج حسن یعقوبی ---------
غزل
گوزلیم یتوردی فراقیله منیم عمرومی باشا گوزلرون
دئنه راضی اولمیا چشمه تک دولا گوزلریم یاشا گوزلرون
او کمان قاشون مژه تیرینی آتوری دوزور سینم اوستونه
وئرور حکم قتلیمی دم بدم توکه قانیمی پاشا گوزلرون
دوشورم دالونجا گلم دیزیم یریمور گلم بودور علتی
قویا سنگ نازی فلاخُنا باسا قورخورام داشا گوزلرون
ایله دربدر ایلیوب گوزون منی سالدی کوچه و برزنه
اونی کافی بولمدی قیس تک منی سالدی داغ داشا گوزلرون
گوزومی او گوزلره گر تیکم گِلِهء محبتی آندیرام
بودی واهمم کی دونه گده گِلَه مرزینی آشا گوزلرون
اورگیمده نیَّتیمی بوله، چووره یوزون یوزومه باخا
بولرم کی واردی محبتی تیکه گوز گوزه قوشا گوزلرون
نه منه باخور نه رقیبیمه، دولانور بو دور زمانه تک
نگرانیم دولانوب گده دوشه قوش کیمی بوشا گوزلرون
اولوم آرزو ایدورم دونوب منه باخموری یانوب آغلورام
نه علاج ایدوم گینه کج باخور دییور اُلمه قال یاشا گوزلرون
اورگیوه سالما سوزی حسن، غم و محنته داخی ویرمه یول
دئمه یاره چوخ نگرانیم قویا منله باش باشا گوزلرون
استاد یعقوبی
منبع مجموعه کانالهای مدح و مرثیه
----------- متن اشعار حاج حسن یعقوبی ---------
غزل
نقصان یتیشر عهدیله پیمانه دانشسام
آگاه اولاجاق سرّیمه بیگانه دانشسام
رحمه گلی یاریم گلوب احوالیمی گورسه
گوگلون آلارام باخسا طبیبانه دانشسام
مخمور ایده لی گوشهٔ میخانه ده قالّام
جنت اولاجاق یاریله میخانه دانشسام
یارین سوزی دوشسه یانارام دینمرم اصلا
ریشخند ایدر اغیار یانا یانه دانشسام
دردی چکرم چون باشیم اوستونده دی جانان
قورخوم بودی مندن چکیله یانه دانشسام
علت اودی کی بیله سکوت ایلمیشم من
مندن سنار اول گوهر دُردُانه دانشسام
اعضای بدن یالواری هر گون دیله منده
گوزدن دوشرم بیر پارا افسانه دانشسام
یعقوبی سنه امر ایلیوبلر دانش، هرگز
فکر ایلمه مردم گله جاق جانه دانشسام
استاد یعقوبی
منبع مجموعه کانالهای مدح و مرثیه
----------- متن اشعار حاج حسن یعقوبی ---------
حضرت امام حسین (علیه السلام)
یاحسین بیر سنون عشقون منی بازاره چکوب
شکَّر لطفودی طوطی کیمی گفتاره چکوب
روز ازلده سنون عکسوی دل ملکونده
مانی عشق گوزل وجهیله دیواره چکوب
گر تاپام عشقی مُنقّش ایلین نقّاشی
سوروشام او منی علّت ندی آواره چکوب
ناز چکماقلقا عاشق، ولی نقّاش ازل
ایتماقا ناز همیشه نیه دلداره چکوب
سلطنت ایلوری ملک دله عشقون شاهی
من مسکینی اوزی اولدوقی درباره چکوب
رشته زلفی سالوب گردنیمه لیلی مثال
منی مجنون ایلیوب آردیجا کوهساره چکوب
آتش شمعه گرکدور یانا هر پروانه
عشقیده بلبل شوریده نی گلزاره چکوب
من یعقوبونی عشقوندی ایدوب دیوانه
هر گون، هر آی، هر ایلی کوچه و بازاره چکوب
استاد یعقوبی
منبع مجموعه کانالهای مدح و مرثیه
----------- متن اشعار حاج حسن یعقوبی ---------
غزل
یانان شمعه پروانه یانسون گرک
او سوز شراره دایانسون گرک
اولا هر کیم عاشق، وفا ملکنه
گیدوب کوچه کوچه دولانسون گرک
قویان راه عشقه قدم رنگ رنگ
خُمِ درد و غمده بویانسون گرک
کیم ایستور دورولسون گویول چشمه سی
یَمِ محنتیله بولانسون گرک
او کسلر که دنیایه بل باغلیوب
دیر پول، پول اوسته قالانسون گرک
یغوب مال دنیانی کیم ظلمیله
عدالت الیله تالانسون گرک
ولای علیدور که حِصنِ حَصین
ولایت سؤینلر اینانسون گرک
علینون مُحبّی علی عشقنه
گوره هر بلا، سهل سانسون گرک
علی نوکری اولسا یعقوبی کیم
اونون ظِلّینه دالدالانسون گرک
استاد یعقوبی
منبع مجموعه کانالهای مدح و مرثیه
----------- متن اشعار حاج حسن یعقوبی ---------
زبانحال حضرت زهرا (سلام الله) به حضرت علی (علیه السلام)
ای امامتین آسمانینه بیر مه منوّر عم اوغلی جان
آغلامه، گئجه گوندوزی منه ایلمه برابر عم اوغلی جان
منده تا نفس وار بیله خیال ایلمه وطنده غریب سن
فکریوه گتورمه کمکسیزم ایل قبیله دن بی نصیب سن
من مریض عشقم منیم بو گون درد عشقیمه سن طبیب سن
تاپشیروب امانت سنه منی حضرت پیمبر عم اوغلی جان
ای وصیّ پیغمبر خدا، وی ولیّ خلّاق کردگار
ایمدی هوش آپاردی بابام گلوب گوردوم عارضینده غبار وار
بار غم بوکوب گوردی قدّیمی منده قالمیوب تاب و اختیار
گوردوم آغلوری، انتظاروام سویلوری او سرور عم اوغلی جان
من شراب عشقین ازل گونی نوش ایدوب او می مست مستیم
ظاهری جهانه گلوب سنون رشته ی علاقنده بستیم
جور و ظلمیدن دل شکسته سن، منده سن کیم دل شکستیم
آتش غمون قلبیمه سالوب سونمیَن بیر آذر عم اوغلی جان
آچمورام سوزون اوستونی نلر چکمیشم یانوب درگهیم منیم
دوشموشم فشاره سخلدی چوخ یاندی بو دل آگهیم منیم
ثانی ووردی سندی قاپی او دم تار و مار اولوب خرگهیم منیم
آشیانیم اود دوتدی قوش کیمی یاندی بال و پرلر عم اوغلی جان
من ریاض عشقونده یاعلی دورت قزل گله باغبانیدیم
زحمتین چکردیم گئجه گونوز دورت گلون، اوزوم شادمانیدیم
نه آنا نه باجی نه قارداشیم وار اودور که من باغری قانیدیم
تک سنی بُلردی امید دل روز و شب بو مضطر عم اوغلی جان
دوقّوز ایلده اولدی سنه منیم هر نه قدر عفو ایله زحمتیم
دوقّوز ایل سنه همسر اولموشام اوج ایدوب منیم شان و شوکتیم
خدمت ایلدوقجا سنه منیم آرتدی حق حضورینده عزّتیم
گَل حلال ایله حقّیوی منه ای بتوله سرور عم اوغلی جان
ایلرم سپر هر بلالره سندن اوتری بو خسته جانیمی
قویمارام حسابه توکوبدولر پشت درده توپراقه قانیمی
دوزمرم دیدیم حالینی گورم منقلبدی روح و روانیمی
شاهد عرضیمون صدقینه اولار ربّ حیّ داور عم اوغلی جان
غسل ویر گئجه دفن و کفنیمی قبریمی ایله گیزلین آغلاما
دفن ایله بیر آز قبریم اوسته دور عارضه دُر اشکی باغلاما
صبر ایله دایان هر مصیبته، هجریمه یانوب سینه داغلاما
آغلاسان مزار ایچه غملنَر حالیوه بو مضطر عم اوغلی جان
دورت بالام آناسیز قالور منیم دوت دله اوزون قویما آغلاسون
زینبیم دوزنمز فراقیمه مانع اولما قوی قاره باغلاسون
مانع اول حسینیم گر آغلاسا، مندن اوتری او سینه داغلاسا
قبر ایوینده قلبیم یانار اولار غملریم مکرّر عم اوغلی جان
دردی اولسا هر کیمسه نون اگر عرض قیلسا گر شیر داوره
دردینه علاج ایلیر یقین دیمیه داخی شخص دیگره
خدمت ایله یعقوبی صدقیله توشه اخذ ایله روز محشره
فاطمه دیه گوز تیکوب بیزه حشریده بو نوکر عم اوغلی جان
حاج حسن یعقوبی
منبع مجموعه کانالهای مدح و مرثیه
----------- متن اشعار حاج حسن یعقوبی ---------
غزل
یارب قالوبدی یولدا گوزوم یار گلمدی
طعنه ائدور منه هامی اغیار گلمدی
دل ویرمیشم او دلبره چون روز بدوده
دل یاندی نیلیوم بس او دلدار گلمدی
گلزار عشقیده گزرم ناله ایلرم
بلبل مثال،مانع اولوب خار گلمدی
مدتدی گورموری گوزوم اول ماه طلعتین
گل تک آچلموری گل رخسار گلمدی
جانیم یتوب دوداقه فراقینده دلبریم
جان اوسته ایتماقا منی دیدار گلمدی
قلبیم ایوین بوشاتمشام هر عشق دولماسین
یارین مکانی اولمیا مُردار گلمدی
شام و سحر قالوبدی گوزوم یولدا انتظار
یاتماز گئجه گوزوم اولی بیدار گلمدی
گونلر گئچوب آی دولانوب ایل گلوب باشا
گوندوز گوزومده اولدی شب تار گلمدی
او وقت اولور گلوب گورسن گویلومی آلا
ایتسین یانان بو بختیمی بیدار گلمدی
قربان اولوم گلن یولونا گلمدی ندن
ایلیوبدی فرقتی منی بیمار گلمدی
شهبازی و رحیمیله باهم دییوردولر
یعقوبیه،یوباندی او دلدار گلمدی
حاج حسن یعقوبی
منبع مجموعه کانالهای مدح و مرثیه
----------- متن اشعار حاج حسن یعقوبی ---------
غزل
نقصان یتیشر عهدیله پیمانه دانشسام
آگاه اولاجاق سرّیمه بیگانه دانشسام
رحمه گلی یاریم گلوب احوالیمی گورسه
گوگلون آلارام باخسا طبیبانه دانشسام
مخمور ایده لی گوشهٔ میخانه ده قالّام
جنت اولاجاق یاریله میخانه دانشسام
یارین سوزی دوشسه یانارام دینمرم اصلا
ریشخند ایدر اغیار یانا یانه دانشسام
دردی چکرم چون باشیم اوستونددی جانان
قورخوم بودی مندن چکیله یانه دانشسام
علت اودی کی بیله سکوت ایلمیشم من
مندن سنار اول گوهر دردانه دانشسام
اعضای بدن یالواری هر گون دیله منده
گوزدن دوشرم بیر پارا افسانه دانشسام
یعقوبی سنه امر ایلیوبلر دانش،هرگز
فکر ایلمه مردم گله جاق جانه دانشسام
حاج حسن یعقوبی
منبع مجموعه کانالهای مدح و مرثیه
----------- متن اشعار حاج حسن یعقوبی ---------
غزل
جانا بیر عمر سایه وه من دالدالانمشام
پروانه مثلی شمع فراقوندا یانمشام
یاتدیم خیالویله گئجه گل یوزون گوروب
تئز دیسگینیب یوخودان هراسان اویانموشام
گوردوم اوزومی یالقوز او غم گوشه سیندیم
صبحه کیمی سرشک غمیله بویانموشام
باشیم اولوبدی غم دیزیمین مونسی مدام
عاشق گرک فراقه دوزه ایندی قانموشام
غم بوته سینده زر کیمی ذوب اولدی جسم و جان
راه وفای عشقیده جاندان اوسانموشام
ترک ایلیوب گئدیب منی چولدن چوله سالوب
دوشدوم دالینجا سایه مثالی دولانموشام
گله بیر اَرخه سو،وار امیدیم گینه گله
صبر ائتمیشم او علَّته داغ تک دایانموشام
قالمور او قدری هجریوه طاقت ترحم ائت
یوخدور دوزوم فراقیوه جانه دایانموشام
یعقوبیم جفای زمانه یوروب منی
خمِّ بلاده رنگ به رنگه بویانموشام
حاج حسن یعقوبی
منبع مجموعه کانالهای مدح و مرثیه
----------- متن اشعار حاج حسن یعقوبی ---------
حضرت امام زمان (عج)
مست ایلسه یاریم منی مستانه لبیندنپ
باشه چکرم باده نی پیمانه لبیندن
درده سالوب هجری منی درمانی تاپولمور
گلسه چاتارام بیرگونی درمانه لبیندن
عاشق اولانون ذکری گرکدور اولا یاهو
بیرحرف اونون چیخمیا افسانه لبیندن
ازبردی منه اسم شریفی گیجه گوندوز
آدین ایشیدوب گلمیشم ایمانه لبیندن
هردم گوزومه جلوه ایدور ساغر لعلی
راضی دگولم که اوپه پیمانه لبیندن
چوخ حسرت اولوبدور منه لعلیندن اوپم لیک
پی در توکوری گوهر دردانه لبیندن
گل بیرده ایدوم بوسه الیندن ایاقیندان
لب اوسته دوشن خالیله جانانه لبیندن
میخانه ده آچسا لبینی نازلی نگاریم
مخمور اولاجاق باده و میخانه لبیندن
(یعقوبیه) گل گلشن حسنونده مکان ویر
مرغ دلینه لطف ایله بیر دانه لبیندن
حاج حسن یعقوبی
منبع مجموعه کانالهای مدح و مرثیه
----------- متن اشعار حاج حسن یعقوبی ---------
حضرت امام زمان (عج)
مهر رخساریوی زلف آتدا نهان ایلموسن
تیر هجرانویله قلبیمی قان ایلموسن
اورگیم ایستوری بیر لحظه گورم گل یوزوی
وار نه علت یوزوی لحظه عیان ایلموسن؟
تازه بیر روح گلر جسمیمه گورسم یوزوی
قوجا وقتیمده منی روحی جوان ایلموسن
گیتمیسن، دیزلریمون تابی گیدوبدور سنیلن
بوکموسن قامتیمی گور نه کمان ایلموسن!
اسم پاکون بلوسن لحظه دیلمندن دوشمز
شغلومی هر سحر آخشامدا فغان ایلموسن
روزگارین ستمی باشمی گوندوز قاتوری!!!
گجه لر صبحه کیمی اشگمی قان ایلموسن
هره بیر سوز دیور آردیمجا سبب عشقوندور
بلوسن، سن منی رسوای جهان ایلموسن
سندن اوتری هامی (یعقوبونی) کافر بلوری
گلموسن داده ندن قانیمه قان ایلموسن؟
حاج حسن یعقوبی
منبع مجموعه کانالهای مدح و مرثیه
نظرات (۰)
هیچ نظری هنوز ثبت نشده است