متن نوحه ترکی شعاع تبریزی
مجموعه اشعار برگزیده آیینی و مذهبی مرحوم شعاع تبریزی در مدح و رثای اهلبیت علیهم السلام ، متن نوحه ترکی از مرحوم شعاع تبریزی
---
در احوالات اربعین
شامده ویرانه ده قارداش اقامت ایلدیم
گوندوزی تبلیغِ دین شبلر عبادت ایلدیم
من حقیقت شمعنه پروانه تک پَر وورموشام
قیدِ ظلمی پنجهء تیر ِغمیله قیرموشام
قدرت ِایمانیله کفرون بِلین سندورموشام
سانما مأموریّتمده ذرّه غلفت ایلدیم
من سنه قربان اولوم ای فخرِ اولادِ خلیل
کوفه ده مرجانه اوغلون ایتموشم زار و ذلیل
کفرینه قرآن مُنزَلدن گتوردوم چون دلیل
قلبِ مردمده اونا تولیدِ نفرت ایلدیم
باشلادی گوردوم زیاد اوغلی منیله جنگِ سرد
باغلادیم منده شهامتله کمربندِ نبرد
سویلدیم امّید حقله یاعلی سندن مدد
قدرت اللّهدن دوباره اخذِ قدرت ایلدیم
باشلادیم بیر خطبه شهر کوفه ده با چشمِ تر
سوزلریم قویدی او دم قلب ِخلایقده اثر
ایلدیم هند جِگر خوار اوغلونون سعیین هدر
آچدیم اُوجون ملّته کشف ِحقیقت ایلدیم
سالدیم آتش آتشین نطقیله قلبِ دشمنه
یاندیروب ایتدیم مبدَّل کاخِ ظلمی گُلخَنه
مطلبی آندیردیم آخر مو به مو مرد و زنه
حق دیوب حقدن حسینیم دفع ِتهمت ایلدیم
من دانشدوقجا آپاردی خلق پِی آمالیمه
باخدی یاندی مطلبه حالی اولانلار حالیمه
کف چالانلار داش آتانلار آغلادی احوالیمه
کوفه نی باشدان باشا دریای محنت ایلدیم
اوزگه بیر عالَم مجسّم ایلدیم انظارده
انقلاب آثاری اولدی آشکار افکارده
چوخ گولَنلَر گوردوم آغلور یوزلری دیوارده
اوندا کی باشون جِدا باشندا رؤیت ایلدیم
جان ویروب سالدون تزلزل کاخِ استبداده سن
منده ویران ایلیوب گلدیم ایا شاه زمن
حقی باطلدن آیردیم گون کیمی ایتدیم علَنَ
صفحهء تاریخه حقّانیّتون ثبت ایلدیم
ایستدی دینی یزیدِ کافر ایتسون استتار
تهمته دیل آچدی سسلندیم اونا ای کین شعار
کَس سَسون دینمه دانیشما سنده یوخ شرم و وقار
وَقرینی پوزدوم او مجلسده خجالت ایلدیم
دوردی قارداش غیضیله ایتدی منه حمله یزید
ایلدیم منده اونا حمله اَیا شاهِ شهید
زینبم من قوخمارام سندن ، دئدیم دور ای پلید
بیر بیر اعمالین سایوب ، محکوم او ساعت ایلدیم
دین یولوندا مرگدن زینب هراس ایتمز دئدیم
دیننی ، دنیالری گر ویرسه لر ویرمز دئدیم
آلِ هاشم دشمنه باش اگمیوب اگمز دئدیم
بو سوزون اثباتینه طشته اشارت ایلدیم
اولدی رأسِ اطیبون بیر شاهدِ عادل منه
ابر چشموندن یاغان قان ویردی خوش حاصل منه
بیر نظرده ایلدون مین نصرت ِکامل منه
مجلسون وضعی پوزولدی شکرِ نعمت ایلدیم
باخمادیم وار دور و برده قان توکن جّلادلر
قانیمی آماده دی توکسون او بد بنیادلر
مطلبه ویردیم ادامه باشلانوب ایرادلر
تا سیه بختین او بی رحمون سیه بخت ایلدیم
سویلدیم فکر ایتمه ظالم واردی سندن واهمم
گور کیمی تهدید ایدورسن هیچ بولورسن من کیمم؟
دخترِ شیرِ خدایم ، زینبم زینِ اَبَم
اهلِ مجلسدن بو سوزده سلبِ طاقت ایلدیم
ذرّه ای باک ایتمدیم اصلا او امرِ سختدن
انتقام آلدیم گوزی یاشلی او تیره بختدن
سالدی هند اوغلون بیاناتِ فصیحیم تختدن
منطقی برهانیله تا واژگون تخت ایلدیم
شکر لله من یزیدون پوزدوم استقلالینی
ایلدیم قرآنله تصویب اضمحلالینی
سرنگون ایتدیم جهاندا پرچمِ آمالینی
باغلیوب کابینه سین تعطیل او ساعت ایلدیم
اولدی آخر مسکنیم هر چند ویرانه منیم
یا مبدَّل اولدی گوزده گوز یاشیم قانه منیم
همّتِ مردانمه باش اگدی بیگانه منیم
صبر ایدوب دوزدوم بلایه کسبِ شهرت ایلدیم
بیر سفارتخانه ایتدیم شامده برپا حسین
قویدوم اوردا بر سفیرِ خرسال و مه جبین
ایلسون شام اهلنه تا وار جهان تبلیغِ دین
عاقبت ویرانه کُنجین رشک ِجنّت ایلدیم
نه سفیر و نه سفارتخانه نه رشکِ جِنان
کعبهء آمال دور اهلِ دله تا وار جهان
ئولدی اللرده رقیّم ویردی چوخ نیسگِلّی جان
حیف اولا بو باره ده شرمنده رجعت ایلدیم
بو (شعاع) چون اولدی شمعِ عشقوین پروانه سی
آدیمی سسلر اودور چوخلار حسین دیوانه سی
فخردور بو آد منه ای فاطمه دُردانه سی
قبروی اولماز غمیم گورسَم زیارت ایلدیم.
مرحوم شعاع تبریزی
منبع مجموعه کانالهای مدح و مرثیه
----------- متن اشعار شعاع تبریزی ---------
در احوالات حضرت امام حسن عسکری (علیه السلام)
معتمد ظلمینده طغیان ایتدی یا صاحب زمان
عدنیده زهرانی گریان ایتدی یا صاحب زمان
بیر ستم ایتدی اتان حقینده اول ظالم سیر
زهریله مسموم ایدوب آخر او شاهی تخم شر
یاندوروب یاخدی وجود نازنینین سربسر
خانه ایمانی ویران ایتدی یاصاحب زمان
طاقت و صبروقرارین آلدی الدن ظلمیله
نورعین مصطفانی سالدی دلدن ظلمیله
ایری سالدی بلبلی گلشنده گلدن ظلمیله
دشمن گل خاری خندان ایتدی یاصاحب زمان
ایله یاندوردی اتان قلبین او زهرجانستان
گل کیمی سولدی سارالدی اول امام انس وجان
نطقیدن دوشدی دایاندی سیریدن شمس زمان
دین ایوین بو ظلم تالان ایتدی یاصاحب الزمان
آرتوروب سوزعطش دردو ملال و محنتین
شدت زهرآلدی الدن اختیارو طاقتین
سلب ایدوب جسم شریفیندن امامین قدرتین
تا سوسوزلوق باغرینی قان ایتدی یاصاحب زمان
ایلیوب احضارعقیدی اول امام خونجگر
ایستدی بیرجرعه سو شاهنشه جن و بشر
ایلدی حاضرغلامی کاسه ده سو مختصر
ایچدی اما دردی ایتدی طغیان یا صاحب زمان
یوزویروبدی حجت الهه او دمده اختلال
عارض شمس هدایتده بروزایتدی زوال
تاپشوروب اسرارینی بیربیر سنه ایتدی زوال
جانینی اسلامه ایتدی قربان یا صاحب زمان
ن-سن ادا ایتدون نمازین عزت و اجلالیله
کفن وذفن اولدی اتان نعشی اوگون اعزازیله
شهرسامرا دولوب یکسرفغان ودادیله
شیعه نی بو غم ایتدی پریشان یا صاحب زمان
محضرجاناندا روح اقدسی تاپدی قرار
جان ویروب جانانه حسرتله شه والاتبار
بومصیبت الدی شاها لیک سندن اختیار
گوزده اشکین مثل باران ایتدی یا صاحب زمان
قورتولوب دفن امری یوزویردی بیراوزگه ماجرا
دودمان رحمته بیردن توکولدی اشقیا
قصدغارتله هجوم اور اولوبلا ربرملا
ضلمه باخ اول قوم نادان ایتدی یا صاحب زمان
الدی غارت قصه سی بو غملی گوگلومدن توان
یادیمه دوشدی بلا دشتینده قوم کوفیان
اوندا که جدین حسین ظلمیله ویردی تشنه جان
فکرغارت حمله عدوان ایتدی یا صاحب زمان
مرحوم شعاع تبریزی
منبع کانال گنجینه گذشتگان
----------- متن اشعار شعاع تبریزی ---------
زبانحال حضرت علی (علیه السلام) خطاب به قبرستان بقیع
قویاندا ساقی کوثر مزاره زهرانی
سرشک حسرتیله دولدی چشم گریانی
مخاطب ائتدی بقیعین یرین دیدی گویا
بو دیللریله او مهر و محبتین کانی
بقیع سنده گُل افتخاری گیزلتدیم
شکسته بیر دُر کنز وقاری گیزلتدیم
نه دُرّ و لعل و نه گوهر نه لؤلؤ و مرجان
بو کیمیادی اولوب غم دچاری گیزلتدیم
ئوزی حبیبۀ حق نور دیدۀ احمد
اولان شفیعۀ روزِ شماری گیزلتدیم
ئولنجه وار یری قان آغلاسام فراقینده
که ئوز الیمله بئله غمگساری گیزلتدیم
مآل کاره باخ ای خاک اولان بو قلبیمده
توان و طاقت و صبر و قراری گیزلتدیم
باشی بلالی گونی قاره بیر پریشان حال
بسان لاله دل داغداری گیزلتدیم
دویان حیاتیدن آز عمریله حیاتیندن
پوزان غمینده من دلفکاری گیزلتدیم
یوزوندن ال اثری گئتمیوب ووراندان عدو
گوروبدی صدمه بو چشم خماری گیزلتدیم
سنان قولی بوکولن قامتی یانان قلبی
دچار درد و غم و آه و زاری گیزلتدیم
گوزونده گوندوزی شامه دؤنن شماتتدن
بلا خدنگینه قلبی حصاری گیزلتدیم
گُل عارضینده واریدی نشانِ خار جفا
یوزونده کی اثر زخم خاری گیزلتدیم
علیده صبر و شکیبایه باخ دل شبده
یانا یانا بئله والا تباری گیزلتدیم
ویرنده دست رسول خدایه گُل بدنین
کفن ایچینده رُخ زخمداری گیزلتدیم
گوزوم باخا باخا زهرانی دوگدولر دوزدوم
رضای حقدن اؤتور ذوالفقاری گیزلتدیم
دیَنمورم قولونا نه جفا ائدوب قنفذ
ئورکده کی او غم ناگواری گیزلتدیم
سپهر عصمت و عفتده دست ظلمیله
دوشن کسوفه مه شرم و عاری گیزلتدیم
یتیشمَسین بو گُله بیرده دست بیگانه
اودور نهانی بو نازلی نگاری گیزلتدیم
بو نسگل آزدی مگر یانه یانه زهرانی
قویوب یارالی مزاره مزاری گیزلتدیم
بو پر بها گُهرین بُلمدی عدو قدرین
بئله بهالی دُر شاهواری گیزلتدیم
شهیده ترک ایلین عالمی جفائیله
یتن خزانه جوانه بهاری گیزلتدیم
آلوب جراحت مسمارتاب و طاقتینی
او یاره دن آلونان اصطباری گیزلتدیم
فسرده حالتیله امته بو عالمده
رسول حقدن اولان یادگاری گیزلتدیم
((شعاع)) مهری بولود آلتدا ایلیوب پنهان
جهانه نور سالان ماهواری گیزلتدیم
مرحوم شعاع
منبع مجموعه کانالهای مدح و مرثیه
----------- متن اشعار شعاع تبریزی ---------
زبانحال حضرت رقیه (سلام الله)
بیر بالا، عمه من کیمی دردیله سازش ایلمز
دردیم اودی بوشامیده بیر گجه کاهش ایلمز
تا یوزومه فلک منیم باب امیدی باغلادی
پوزدی ایله جلالمی حالیمه دشمن آغلادی
شعله نار هجریله یاره لی قلبی داغلادی
دلده بو سوز داغ تک هیچ یارا سوزش ایلمز
بیر قزین الدن عمه جان گیتسه آتاسی قارداشی
قانه سزادی من کیمی دونسه گوزونده گوزیاشی
بختی قرا اولوب دوشر چوخلی بلالره باشی
بیر ده محبتین گونی فرقته تابش ایلمز
آیریلرب ایل قبیله دن من که آرالی اولموشام
خورداجا سنیله بیله باشی بلالی اولموشام
من بولورم آتام الوب یاسلی عزالی اولموشان
گزلدور عمدا،ً عمه لر شرحی گزارش ایلمز
باطن شخص ظاهره رسمدی امتحان ویرور
سن کیمی صبر صاحبه موج بلا تکان ویرور
سن دیموسن ولیک ایش اوز اوزونی نشان ویرور
هیچ کیم آتالی بر قزا بیله نوازش ایلمز
چوخلارین عزتین بدل ذلته چرخ دون ایدیب
توش ایلیوب بالا لره محنتینی فزون ایدیب
چوخ دله داغ غم چکوب ظلمله لاله گون ایدیب
طالعه باخ منیم کیمی هیچ کیمه کردش ایلمز
عمه اگر منیم بابام کعبیه ایلیوب سفر
بس نیه نه اوزی گلور نه بیزه گوندرور خبر
بیربیله مدتی سفر ایلمیش اولسا بر نفر
در بدر اهل بیتنه یوخسا سفارش ایلمز
باشدان ایاقه بی سبب اشگتره بویانمورام
شام و سحر سپند تک نار غمیله یانمورام
اکبریمون مسافرت ایلماقین اینانمورام
طول سفر ایدن مگر نامه نگارش ایلمز
بولموری اکبریم مگر نسگلینی رقیه نین
مشگلی وار گلوب آچا مشگلنی رقیه نین
شاد ایلیه خرابده تا دلینی رقیه نین
حل اولا امر دل یقین اوز گه گشایش ایلمز
یالوارورام گجه گونوز باد صبایه عمه جان
بیر گیجه تایولون سالا کرببلایه عمه جان
اکبریمه دیسون که گل شامه عزایه عمه جان
یوخسا یتیمه بر باجی قارداشا خواهش ایلمز
سالک راه حق گرک کسب ریاضت ایلیه
لازمه دور اسیر اولان رنجیله عادت ایلیه
کیمدی منیم کیمی ولی دردیله الفت ایلیه
بستری خاک و خشت بر شه قزی بالش ایلمز
عمه روادی غصه دن گل کیمی عرضیم سولا
هر گلن اینجدوب دو گه گوزلریم اشگیله دولا
خوردا اوشاقه ظلم ایدن هر نجه سنگدل اولا
زخم ایدر ایتمسه یقین ظلمونی فاحش ایلمز
سالدی منی ایاقیدن دلده کی رنجیله تعب
اینجمیشم یورولموشام ایتدی مریضه تاب و تب
ایله دعا رقیه نی وقت نماز نصف شب
سنکمی عمه خالقه کیمسه نیایش ایلمز
حسرتیله گیجه گونوز یولا را گوزلریم باخار
اکبرین آیرلق غمی قلبمی یاندروب یاخار
اوندا که سسلرم علی عارضه اشگتر آخار
فصل بهاریده بولود هیچ بیله بارش ایلمز
عالم شعر و شاعری عشق و محبت اوسته دور
بعضلری مجازی دور بعضی حقیقت اوسته دور
عشق«شعاع»حسینه دور نیتی خدمت اوسته دور
هر نه او شه سویه سویر غیره ستایش ایلمز
مرحوم شعاع
منبع مجموعه کانالهای مدح و مرثیه
----------- متن اشعار شعاع تبریزی ---------
احوالات مجلس یزید
یزید او باشه اولوب چوخ یارا ووران وورما
یارالیدی گوروسن قارداشیم اوتان وورما
خدادن ایله حیا بر اوتان پیمبردن
لبان لعل گهر باره خیزران وورما
ایکی سویون آراسندا او شاه دلخسته
سویا باخوب دیدی سوویر دی تشنه جان وورما
اولبلر یکه آتاسی آناسی جدی اپوب
روا دگول اونا بو ظلم بیکران وورما
آناسی فاطمه بوس ایلین دوداقلارا سن
ووراندا قمچی چکور دلدن الامان وورما
آنا باخا باخا وورمازلار اوغلونی ظالم
چتین دوزر آنا بو حالته دایان وورما
سوسوزدی سوز عطشدن دوداقلاری یانوری
ووروب یارالاما ای دین ایوین یخان وورما
او لبلریکه ورورسان آغاج آخور قانی
محمد(ص) عربی قانیدور اوقان وورما
آغاج او لبلره وردقجا ای جفا کانی
چکوب سس آغلوری معناده قدسیان وورما
بالالاری باخوری رحمه گل حیا ایله
ایدوله ناله لرین قورخودان نهان وورما
او ظلم که ایدوسن بو یارالی قانلی باشا
تزلزله گلوری عرش لامکان وورما
یارالی قارداشمی ورما ظالم اینجیتمه
چوخ اینجیدیبدور اونی شمریله سنان وورما
اوباش حسین باشیدور نور دیده طاها
عزیز فاطمه دور شاه انس جان وورما
دیار کرببلادن ویروب مکان او باشا
کول اوستی خولی بی دین سنان سنان وورما
هوایه غیظیله سن قوزیاندا نحس الووی
رقیه عارضه اشگین ایدیر روان وورما
بالام یاخندی اولا غصه دن هلاک اوتان
داخی دوزنموری بوزار و ناتوان وورما
ووراندا سن او لب فامه چوب جفا
بو خوردا قزلارا محشر اولور عیان وورما
او که جفادی ایدیبدور او باشه ابن زیاد
ترحم ایله قیل ایذادن امتنان وورما
بو یاره لر که گورورسن لبینده قارداشمون
فنر یاراسیدی قانی آخور بو آن وورما
کسوبله باشینی بو سهلدور ستمله اونون
سویوبلا رختینی اشرار بد گمان وورما
قناعت ایتمدیلر بر بیله جفایه یزید
بیلکدن اللرینی کسدی ساربان وورما
اونون جوانی الوب قلبی داغلانوب بسدی
کفایت ایلر اونا داغ نوجوان وورما
شبیه احمد مختار تک گوزل بالاسین
گوزی باخا باخا اولدوردی کوفیان وورما
حسینین اللری اوستونده سود امر اوغلون
ستمله اوخلادی ناحق شامیان وورما
یزید کیم گوروب عالمده سود امر بوغازی
سه شعبه زهرلی تیره اولا نشان وورما
حیاتیدن ال اوزوب خاطر الوجه له
اسوبدی گلشنینه سرسر خزان وورما
گهی شماتت ایدورسن گهی یامان دیوسن
جهاندا رسمدی شه لر دیمز یامان وورما
قالان دگول بو ریاست سنه غرور اولما
بو غفلتین یوخوسوندان داخی اویان وورما
جفاده قویماموسان ذرجه قالا نقصان
ویرر جهانه بو ظلمون سنون تکان وورما
بیله خیال ایدیسن حقه اولموسان غالب
چوخ اشتباه ایدوسن ای دنی اینان وورما
ایدوبدی عقلوی ضایع سنون شراب و قمار
چخوب الوندن اودی توسن بیان وورما
یالانجی نسبتی ویرمه بیزه که واضحدور
همیشه فاجر و فاسق دیر یالان وورما
یالانجی فاسق و فاجر اوزونسن اجدادون
بولور بو مطلبی یکسر جهانیان وورما
اولوبدی آیه تطهیر شانیمزده نزول
یتوبدی بیزلره حقدن بو عزوشان وورما
ووروب او باشه جفا داشی بر عجوزه الی
اولیدی شل او جفا داشنی آتان وورما
الونجا حشر غمینده اونون یانار آغلار
آناسی فاطمه اول قامی کمان وورما
(شعاع) بو قصه جانسوز طول ویرمه که سن
دینینده داده گلور اهل آسمان وورما
او ظلملر که یزید ایتدی آلطاهایه
ادیم مثلیدی تاریخه یوخ یازان وورما
دی زینبین دلیجه بو سوزی مدام آغلا
یزید او باشه اولوب چوخ یارا وران وورما
مرحوم شعاع
منبع مجموعه کانالهای مدح و مرثیه
----------- متن اشعار شعاع تبریزی ---------
زبانحال حضرت رقیه (سلام الله)
بودل شبده منی یاد ایلدون سن یارالی
بو نه عالمدی بابا سن یارالی من یارالی
یارالی جان یارالی من سنه قربان یارالی
بو نه عالمدی بابا سن یارالی من یارالی
گلموسن بو گیجه وقتی قزیوی یاد ایده سن
غملیدی غصه لیدی غصه دن آزاد ایده سن
غصه ویران ایلین گوگلونی آباد ایده سن
ایوین آباد اولا گَل یاخشی گلوبسن یارالی
من بولوردیم که سنق قلبلری سن آلاسان
رأفتیله یارالی دللره مرهم سالاسان
گلموسن بو گیجه ویرانده مهمان قالاسان
قالسان اولاّم ستم شمردن ایمن یارالی
دولانیم باشوه من کیم سنی بو حاله سالوب
سنی بوحاله سالان تاب وتوان مندن آلوب
بو باشوندور بابا جان بس بدنون هاردا قالوب
کسدی باشون دی گوروم هانسی دل آهن یارالی
کیم وروب دست ستمله بو گوزل باشه یارا
باشوه یاره وورانلار گونومی ایتدی قارا
سن هارا یاره هارا من هارا ویرانه هارا
عزتیم سنله گیدوب ای سر بی تن یارالی
من بولوردوم که بابا واردی قضاسی باشوون
گله ای کاش منه جمله بلاسی باشوون
گوزلریمدن بوآخان یاشدی دواسی باشوون
اوزگه درمانه گمان یوخدی بولورسن یارالی
قان اولان گوگلومی ویران ایلدی باش یاراسی
هامی بیر یاره دن اولموش لبوون باش یاراسی
یاندورور قلبیمی آنونداکی بو داش یاراسی
دوتوب اود من کیمی دلدن یانا دشمن یارالی
گل دوداقونداکی بو قانی آخان یار ه ندی
قانی خشک اولموری ایوای منه بس چاره ندی
منده یوخ چاره ایدم چارة بیچاره ندی
ویر نشان چاره یولون گل دله دیللن یارالی
دگی بیجا قزیوی گوزدن آتوبسان باباجان
باش وئروب مقصد و مقصوده چاتوبسان باباجان
یوخسا مطبخده تنور ایچره یاتوبسان باباجان
بلشوب تا کوله بو حسن محسن یارالی
سالسا باجادی شرر کونه شرار محنیم
تیره شامه گونوزیم دوندی بو شام ایچره منیم
تازیانه اثریندن گوی اولوبدور بدنیم
غبطه بوجسمه ایده وار یری سوسن یارالی
آغلادار باخسا مدام آل خلیلی یوزومه
قان دولان گوزلرون آچ باخ بابا نیلی یوزومه
گور نجه شمر وروب ظلمیله سیلی یوزومه
ایلیوب طعن او خانا سینه می مخزن یارالی
سن نجه گون کیمی باتدون ایله منده باتارام
سنون عشقونده بو عالملری گوزدن آتارام
کنج ویرانده قبریمده کفنسیز یاتارام
دییر عشاق جهان عشقمه احسن یارالی
عموم عباسه نه گلدی سنه ال تاپدی عدو
قویدی یوخسا اونا حسرت من بیچاره نی سو
سویی اولمادی اودی خیمیه دوندرمدی رو
سویله گل ایستمرم بیرده سوگلسن یارالی
سالدی دامه منی سندن صورا صیاد بلا
سنه تابع اولوب اولدوم نه بلا گلدی رضا
دیلیمه دگمدی بو مدتی بر ایستی غذا
بنزرم قالب بی روحه اودور من یارالی
چوخ دوگوبدورر بابا یوللاردا منی شمر دنی
بیر دیین اولمادی دویمه بو جلای وطنی
چاغوراردوم او وورندا منی امداده سنی
گلمدون دادیمه کوسدوم اودی سندن یارالی
من دیدیم کوسموشم آرتدی غمون ای طاقتی طاق
عفو ایله گل ئلورم بیرجه دوینجا دانشاق
قوی اُپوم بیرده یارالی دوداقوندان بارشاق
سنه نسگل اولی اُلسم منه شیون یارالی
آغلاما خسته سن اوز روحووی ابنجیتمه بابا
آغلیوب لاله کیمی باغریمی قان ایتمه بابا
اُلورم گل منه خاطر بوگیجه گیتمه بابا
من اُلندن صورا نسگل اولی گیتسن یارالی
مرحوم شعاع تبریزی
منبع مجموعه کانالهای مدح و مرثیه
----------- متن اشعار شعاع تبریزی ---------
احوالات دیر راهب
یارالی کیمسن ائدوب دِیریمی نورانی باشون
طور سینادن ائدوب باش بو کلیسانی باشون
دولانوم باشیوه ای باشی سالان عالمه شور
نور حق ایلوری بو رأس منوّرده ظهور
وار یری رشک آپارا بو یره گر وادی طور
بر ملا گورسه سالار حیرته دنیانی باشون
گورمیوب دهریده بیر گوز بئله بیر حُسن و جمال
حُسن یوسف اولا بولمز بو گوزل حُسنه مثال
نیه قانه بلشوبدور بو دل آرا خط و خال
یاندیریر حسرت اوتوندا دل دنیانی باشون
سلب ائدور کیمسن اورکدن محنون صبر و قرار
دوتوب اوت حالیوه هر بیر باخانون قلبی یانار
عارضونده ندی بو خاک مذلّت بو غبار
حشره دین حقلیدی آغلاتسا احبّانی باشون
کیمسن ای عارض چون مهر درخشان دولانان
یارالی باشیله احوالی پریشان دولانان
آردیجا چوللری بیر دسته پریشان دولانان
چکور آخر هارا بو جمع پریشانی باشون؟
بولمورم هاردا اولوب ظلمیله ویران چمنون
یا گئدوب غارته هاردا چمن پر ثمنون
هاردا باشون کسیلوب هاردا قالوبدور بدنون
سلب ائدور دلده اولان صبر و شکیبانی باشون
کیمسن ای نور رخی طعنه ووران مهر و مهه
اوخشادور حالت مظلومیتونبی گنهه
ووروب هانسی شل اولان اَل یارا بو سجده گهه
وئور عالملره شقّ القمر اعلانی باشون
کیمسن ای کان شرف یوخدی مگر دادرسون
مات و مبهوت قویوب عدنیده داوودی سسون
دم وئرور قالب بی روحه مسیحا نفسون
حقبه ارشاد ائدوری گبر و نصارانی باشون
کیمسن ایا نه مرامون باشون آواره سیدی؟
هانسی درد و محنون و درد دلون چاره سیدی؟
بو جبینوندکی یاره آقا نه یاره سیدی؟
غرق بحر غم ائدور عالم امکانی باشون
کیمسن آیا گئدوسن نوک جدالرده هارا؟
بو حقارتله سنی خوش دگول اعدا آپارا
کیم ووروبدور بو لب لعل گهرباره یارا
یارالاردان گُل آچوب چون گُل رضوانی باشون
کیمسن ای خون دلیله قاریشان اشک تری
چرخ اعجاز و کراماتون ایشیقلی
ندی بو عارض گلفامیده کی کول اثری
هانسی بی رحمون اولوبدی گئجه مهمانی باشون
کیمسن ای عارض زیباسی بئله قانه باتان
کوللر اوستونده یاتوب مقصد و مقصوده چاتان
نطقه گَل بیرجه دانیش عالمی ای گوزدن اتان
وار نه علّت دولانور کوه و بیابانی باشون
ائده سن خوشدی (شعاع) راهبی بو یرده خطاب
یاز حسینون دلیجه جمله سوالاته جواب
اجریوی قوخما وئرر بو شه دین یوم حساب
دولانار اوندا که شرمنده بیابانی باشون
مرحوم شعاع
----------- متن اشعار شعاع تبریزی ---------
ورود به کربلا
اردوی همایون شهنشاه مدینه
غم دشتینه گلدی غمه باشلاندی زمینه
سرلشکرینی محضره احضار ایلیوب شاه
امر ایتدی چوخور یرده وورون خیمه و خرگاه
فرمانده نیروی شه مُلک امامت
فوراً ایلدی امر ملوکانیه طاعت
پخش ایتدی او جمعیّته بو حکمی او ساعت
یکسر دایانوب دوردی گلن جمله سراپا
فرمانِ مُطاع شه کونین اولوب اجرا
اوّل قورولوب پادشهین خیمه سراسی
نصب اولدی اونون قبّه سی اوستونده لواسی
بیربیر دوشنوب خیمیه شاهانه اساسی
غبطه یری وار ایتسه بو اجلاله سلیمان
هاردِیدی سلیماندا بیله عزّت شایان
اقدام اولونوب خیمه و خرگاه دوشنسون
یاتسون دوه لر، اهل حرم ناقه دن انسون
شاهانه اساسیله بلا دشتی بزنسون
فتیان بنی هاشم ایدوب جمله اراده
بیربیر حرم عصمتی ایتسونله پیاده
بیربیرلرینه سبقت ایدوب شیر ژیانلار
جان نقدینی بازار محبّتده ساتانلار
مین مهر و محبّتله او مه پاره جوانلار
سویلردیله هر تک تکی بیر طفله مکرّر
آغوشیمه گل ای صدف عصمته گوهر
بیر یاندا دوشوب لشکر سلطان سلاطین
نصب اولدی اویان سمتیده خرگاه خواتین
شهزاده لر اندوردی شهین خوردا بناتین
هر تازه جوانین بالا بیر قیز قوجاقیندا
بلبل دیه سن بس اوتوروب گل بوداقیندا
ویر بیرجه امان ای یوزیمه گوزدن آخان یاش
قوی باری ایدوم دلده کی گیزلین سوزیمی فاش
اندیردی اوغولّار آنانی، باجینی قارداش
امّا نجه اندیردیله یوخ شرحینه قدرت
بیر گوز گوره هیهات ایله شوکت ایله عزّت
تا اینکه چادرلار قورولوب اولدی مرتّب
وقت اولدی که اجلال نزول ایلیه زینب
محملدن انن دمده او بانوی مودّب
سرعتله گلوب محضره سرداری حسینون
خم ایلدی زانوسین علمداری حسینون
جمع اولدی جوانلار خانمین دوره سین آلدی
بیکسلرین او چولده آرایه کسین آلدی
زهرا قیزی تا آل علینون سسین آلدی
دولدوری گوزین شوق و شعفدن او دل آگاه
سسلندی سیزی زینبه چوخ گورمسون الله
صاقدان قولون اوّلده دوتوب شبه پیمبر
قاسمده دوتوب صول قولون آهسته موقّر
حائل اولوب اکرامیله عبّاس دلاور
اندیردیله نازیله او بانوی حجازی
رشک ایتدی فلک گوردی بو اعزازیله نازی
غملندی قویاندا ایاقین دشت بلایه
اشکی خانمون آخدی، گلوب شور و نوایه
گویا بیله عرض ایلدی شاه شهدایه
نه یردی بو یر گتدی منی درده حسینیم
گل وورما بو صحراده سراپرده حسینیم
قارداش بو یرین آب و هواسینده بلا وار
نه قلب آچیلور بوردا، گولور یوز، نه صفا وار
قلبیم دویونور یوخسا باشیمدا نه قضا وار
بو سرّیده وار گوگلومون آرامین آلوبدی
زینب سنه قربان نیه رنگون سارالوبدی
بیرده دیدی چوخ گورموشم ای سبط پیمبر
دعوایه گیدنده آتامیز ساقی کوثر
خرگاهین ایدردی اوجا یرلرده مقرّر
علّت ندی سن ایتدوز اونون عکسینه رفتار
امر ایتدون اولا نصب چوخور یرده چادرلار
افسرده گورنده باجیسین شاه شهیدان
رافتله دیدی آغلاما گوزیاشیوه قربان
منله آتامین فرقی وار ای غمکش دوران
چون دشمنه دعواده آتام غالب اولاردی
قورسون اوجادا خیمه اودی طالب اولاردی
تشریح ایلیوم من نه دلیله جریانی
مغلوب ایده جاق لشکریمی دشمن جانی
صحرایه حسینین آخاجاق سو کیمی قانی
دنیا بویی دینه ویره جاق رونق لایق
جدّیم گتورن شرعه اولار آهنین عایق
بو یر دولانوب روضه ی رضوان اولاجاقدی
هر گوشه سی مین رشک گلستان اولاجاقدی
توپراقی هامی دردلره درمان اولاجاقدی
عاجزلسه هر دردین علاجینده اطبّا
بیر ذرّه سی ایلر مین ایله درده مداوا
معبودیمه بوردا ایدرم تشنه ملاقات
حیرتده قالار صبریمه سکّان سماوات
کعبه یرینه بو یر ایدر فخر و مباهات
بو یردی نه چون ظلمیله ثارالله آخان یر
ثاراللهی زهرا آغاران زلفه یاخان یر
یتمیش ایکی قربانه منادور بو بیابان
هر تک تکی دین اوسته ویرر جان باجی عطشان
قربانلاریم ایچره ولی وار بیر قوزی قربان
چون سوز عطشدن یاناجاق لبلری زینب
آغلار قویاجاق عالمی نسگل لری زینب
صبح اولماسا بو ظلمه حقیقت علن اولماز
نخل ستم و جهل و جفا ریشه کن اولماز
گر سنده اسیر اولماسان الله دین اولماز
ویر ال اله منله ای آنام نور دوعینی
تا قوزیاق عالمده باجی پرچم دینی
پایانه یتر شامیده چون امر اسارت
قارداشسیز اوغولسوز ایده سن یثربه رجعت
من گیتمرم امّا وطن اولماز منه قسمت
گورسن دولانان یرلریمی بیرده وطنده
وورما یوزه سیلی یریمی خالی گورنده
ختم ایله «شعاع» طائر فکرون گینه آزدی
آغلاتدی قلم بسکه اسارت سوزی یازدی
آغلا دیمورم آغلاما بو غم مگر آزدی
بیر عمریدی اودلور اورگون آتش حسرت
چاتدی باشا عمر، اولمادی قبری سنه قسمت
مرحوم شعاع
منبع مجموعه کانالهای مدح و مرثیه
----------- متن اشعار شعاع تبریزی ---------
در شهادت حضرت امام جواد (علیه السلام)
ظلمله جواد الائمه نی امّ فضل مسموم ایدوب بو گون
یاندروبدی زهریله قلبینی کایناتی مغموم ایدوب بو گون
نه یوزیله بولمم او بی وفا بو جفالره جرات ایلدی
معتصم او بی ننگ و عاریله قتلینه اونون شرکت ایلدی
ویردی زهر کینه او سروره گوزده گوندوزون ظلمت ایلدی
اوز جفای بی منتهاسنی اهل دینه معلوم ایدوب بو گون
گر دیسم نه نوعیله اول شهی ایلیوبدی مسموم او بی حیا
وار نه منده قدرت یازام اونی وار نه سنده طاقت ایشتماقا
ایلورم فقط مجلسی یازان ماجرایه بو یرده اکتفا
چون بولور هامی ظلمله نجه اول غریبی مسموم ایدوب بو گون
وار نچه خبر الده لیک من ایستورم برین ایلیم بیان
بر خبر ده وار یازمارام اونی لال اولا دلیم ایلسم عیان
ایلورم امام زمانیدن من حیا او سلطان انس و جان
چون اوزی بولور جدینی نجه اهل کینه مظلوم ایدوب بو گون
واریری بو غمده اوقدر من آغلیام دوشه نوریدن گوزوم
زهریله یانان قلبینه اولام هم بالالارم هم فدا أوزوم
مجلسی یازار ویردیلر اونا ظلمله عدو زهر دار اوزوم
قلبینی خدنگ جفائیله اوز عیالی مصدوم ایدوب بو گون
باغلادی قاپونی او بی وفا قویدی تک وصی پیمبری
یالقوز ایوده قالدی سیزلدادی دولدی اشک حسرتله گوزلری
ایلدی اثر زهر کین دوتوب اود آلشدی یاندی جگرلری
پیشوای دینی حیاتدن دست ظلم محروم ایدوب بو گون
اگلشوبدی بر گوشه ده غمین عرض ایدردی ای خالق جهان
شاهد اول اوزون اشقیا منی ظلمله نجه ایتدی باغریقان
اود دوتوب یانار قلب مضطریم حالیمه ولی یوخدی بریانان
دلده کی غم بیشماریمی امّ فضل مکنوم ایدوب بو گون
نازنین وجودیندن ایلدی سلب بو جفا تاب و طاقتین
شدت ایلیوب زهر دم به دم آرتروب اورکده حرارتین
قلبنه شراره سالوب عطش نور چشم شاه ولایتین
عدنده بتولی پیمبری بو محنده مهموم ایدوب بو گون
پارچالاندی لبلر اورک یانوب ویرمدی امان سوزش عطش
یاندی لبلریم بر ایچیم منه سوویرون بویوردی او ماه وش
گوردی بر کنیز آز قالور ایده شدت عطشدن او شاه غش
اشک چشمیله گل عذارینه غملرینی مرقوم ایدوب بو گون
دولدوروبدی بر جام سو کنیز تا گتوردی ویرسون او سروره
امّ فضل گوردی کنیزیدن آلدی جامی توکدی سویی یره
سویلدی جواده سوء ویرمیون بو گرگدی لب تشنه جان ویره
جنت ایچره زهرانی دلغمین بو ستمله اولشوم ایدوب بو گون
حضرت علی النقی ویروب سو آتاسنا قیلدی کامیاب
سوایچوب امام زمان ویروب جان ایدوب احبانی دلکباب
نی کیمی گلوب نالیه اودم ایلدی نوا اهل نه قباب
حضرت جواد اهل عالمی اوز غمینده مألوم ایدوب بو گون
یالقز ایوده جانانه تاپشروب جان پیمبرین نور دیده سی
باتدی گوردولر مهر برج دین دوتدی عالمی ظلم پرده سی
ویردیلر خبر امّ فضله گل أولدی شاهدین گلموری سسی
شاد اولوب او ملعونه بولمدی عزتینی مختوم ایدوب بو گون
مرحوم شعاع
منبع مجموعه کانالهای مدح و مرثیه
----------- متن اشعار شعاع تبریزی ---------
در مدح و میلادیه حضرت معصومه (س)
السلام ای دختر موسی ابن جعفر السلام
السلام ای نو گل باغ پیغمبر السلام
السلام ای گوهر درج حیا کان شرف
ای جدا ازجدوباب و عم و خواهرالسلام
السلام ای آرزویش مانده در دل ته به حشر
در زبان نام رضا مرده مکدر السلام
السلام ای خفته در آغوش خاک پاک قم
ای چو عمش زینب محزون و مضطر السلام
خفته ای تو گرچه در دل درد فرقت بر ملا
لیک زینب خفته در سینه غم بند و بلا
خفته ای تو با تن سالم ایا معصومه جان
لیک زینب خفته اندر تن ز خنجر ها نشان
خفته ای در قبرتو مهموم و محزون و فکار
لیک زینب خفته از زخم زبان دل زخمدار
خفته ای تو با دل پر از ملال و دردوغم
لیک زینب خفته با زلف سفید و قد خم
خفته ای تو از برادر روی سینه نامه ای
لیک زینب خفته روی سینه خونین جامه ای
ای که قم از مقدم پاکت شده رشک جنان
کی شود گردم به دور قبر تو با صد فغان
از ره لطف و کرم آخر (شعاع) را یاد کن
خرمن هجران را با یک نظر بر باد کن
مرحوم شعاع
منبع مجموعه کانالهای مدح و مرثیه
----------- متن اشعار شعاع تبریزی ---------
در شهادت امام جعفر صادق (علیه السلام)
ایلیوب رحلت جهاندان نور چشم بوتراب
حضرت صادق وصی حضرت ختمی مآب
گلشن زهرایه اسدی صرصر ظلم و ستم
گل لرین هر دوره ده بیربیر دروب بیر بد شیم
سوز وئروبدور باغبانه خار الینده تازه غم
کاش اولیدی بیر بئله دوران گوروم یارب خراب
قویمادی آل امیه ظلمیده نقصان قالا
حشر دین گئتمز اورکدن ماجرای کربلا
تا یتوب نوبت بنی عباسه بو گوم برملا
اود ووروبلار گلشن اسلامه بو اهل عذاب
ظلمیه حق امام صادقی غصب ائتدیلر
مسندینده بی حیا منصوری تا نصب ائتدیلر
اوزلرینه جور و ظلمی اهل کین کسب ائتدیلر
سالدیلار بو عالمه بیر خانمانسوز انقلاب
دوشدی بوفکره او منصور جفاکار و لعین
ئولدوره پیغمبراوغلون محواولا آثار دین
ایلدی احضار او ظالم بیر گئجه اوز حاجبین
مست جام نخمت ائتدی حاجبه بیله خطاب
سویلدی گرچه اولوب خانه نشین شاه زمن
لیک مانعدور ریاستده منه بو نور علن
سونمه سه زهرا چراغی اولمارام آسوده من
امریمون اجراسینه جان و دلیله قیل شتاب
باخما قورخار نازنین اطفالی گیت احضار ائله
گلماقا بو مجلسه وئرمه امان ناچار ائله
تئز گتور هر وضعده اولسا او شاهی خوار ائله
بو گئجه قتله یتورسم دلده قالماز التهاب
تا گلوب دیواردن دوشدی او شوم بد سیر
نه پیمبردن اوتاندی نه ائدوب حقدن حذر
دقتیله دودمان حضرته سالدی نظر
باخمادی جایز دگول شرعا بو کار نا صواب
اهل بیت عصمتی گوردی ائدوبلر خواب ناز
لیک یالقزدی قویوب باش سجدیه شاه حجاز
ایلوری خلاق بی همتائیله راز و نیاز
دل آچوب ذکر خدای بی نیازه اول جناب
وئرمدی مهلت امام عصره اول کینه شعار
باشینه قویسون عمامه حجت پروردگار
سر برهنه عازم اولدی قصر منصوره فکار
آخدی اشگ حسرتی گوزدن یوزه چون دُرّ ناب
دستگیر اولدی ولی حق اوکینه گستره
ایسته دی اوز کینه سین بی کس امامه گستره
قصد تهمتله سوار ائتدی اونی بیر استره
بو اهانتدن یانوب قلب امام مستطاب
کاخ منصوره یتنده لنگر ارض و سما
آلدی رخصت تا ایکی رکعت نماز ائتدی ادا
کلمه حق دلده دوردی شافع روز جزا
وارد اولدی مجلس منصوره شاه نه قباب
وئرمدی رخصت امامه باری اگلشسون امام
ناسزایه آچدی دل سسلندی با غیظ تمام
وار خلافت فکرون ایلورسن علیهیمده قیام
سلطنت شوقی ندور سنده دایانما وئر جواب
ائتدی فرمایش منه کاذب دئمه شرم ایله سن
سویلیوب صادق منه جدیم رسول ذولمنن
منده یوخ فکر خلافت افترادور بو سخن
حق ائدوب گرچه منی عالمره مالک رقاب
غیظیله دوردی یریندن تا او مرتد لعین
قبضه شمشیره اوچ دفعه آپاردی نحس الین
هر او چونده گوردی ظاهر اولدی ختم مرسلین
ائتدی فرمایش بالامدان ال گوتور ای کین مآب
باک ائدوب منصور بی دین احمد مختاردن
منصرف اولدی او فکر شوم و بد رفتاریدن
ال گوتوردی نور چشم حیدر کراریدن
چوخ محبتله یولا سالدی ولی اولموب مجاب
تابع نفس اولدی آخر نفسه طاعت ایلدی
دین و قرآنی آتوب حقه جسارت ایلدی
وئردی زهر اول سروردینه خیانت ایلدی
یاندیروب قلبین امام عصرین ائتدی دلکباب
اود دوتوب اکبادی یاندی پارچالاندی لبلری
گوردی اطفالی بو حالی آرتدی تاب و تبلری
قویدی آغلار حشر اولونجا جعفری مذهبلری
وئردی جان جانانه آلدی شیعه لردن صبروتاب
قویمادی اما آتا نعشین اوغول یرده قالا
وئردی غسل ائتدی کفن موسی بن جعفر بر ملا
عزت و اکرامیله دفن ایلیوب دوتدی عزا
سس چکوب آغلاردی بو ماتمده جمله شیخ و شاب
جسمدن با جادی شیعه رخت حسرت سویمویا
آغلاماقدان دیده احباب ئولینجه دویمویا
یرده بیر کس اولمادی نعش حسینی قویلویا
قالدی اوچ گون اوچ گیجه تپراقلار اوسته بی حجاب
نه قالوردی قارداشی نه اوغلی نه بیر یاوری
قویمیا گونلر ایوینده عور او نعش اطهری
اولمادی دفن ایلین بیر پاره پاره پیکری
آغلادی بو غمده جن و انس و افلاک و سحاب
سهلدور گونلر ایوینده قالدی جسم اطیبی
قویمادی دشمن عزا دوتسون حسینه زینبی
زنیب آدی گلدی ختم ایله «شعاع» بو مطلبی
طول اولار گئتدی نئجه شامه دئسن قولدا طناب
مرحوم شعاع
منبع مجموعه کانالهای مدح و مرثیه
----------- متن اشعار شعاع تبریزی ---------
زبانحال حضرت معصومه (سلام الله)
هارداسان ای چول لره عشقی سالان معصومه نی
جان ویرور درک ایله قارداش باغریقان معصومه نی
من برادر سندن اوتری ایلدیم ترک وطن
چول لره دوشدوم آدون دلده آدون قربانی من
اولمادی صد حیف قسمت وصلون ای شاه زمن
ایتدی صیاد اجل تیره نشان معصومه نی
فرقتون مشگل اولوب بولدون باجون معصومیه
لطف ایدوب یازدون اودی نامه من مهمومیه
باخجاق ایتدیم امروه طاعت من اول مرقومیه
سمت طوسه ایلدی مهرون روان معصومه نی
بحر غمدن کشتی امیدی اخراج ایلدیم
خرمن یاسی ید وجدیله تاراج ایلدیم
شوق وصلون باشدا قارداش طی منهاج ایلدیم
ایلدی اما فلک بی خانمان معصومه نی
من دیردیم اولسا گر بیرده وصالون قسمتیم
تا وارام باشه یتر عالمده درد و محنتیم
بولمدیم اولم قالار اما اورکده حسرتیم
چرخ کج رفتار ایدوب غربت مکان معصومه نی
وردیمی تا وار نفس قارداش قارداش ایلرم
باشیوا گلسن بو نقد جانی شاباش ایلرم
شمعیله پروانه سرین عالمه فاش ایلرم
بولسون عشقونده صدیق اهل جهان معصومه نی
گور گوزوم قالسون روادی درده بی کس لر کیمی
یا گله آشفته گوگلوم درده بی کس لر کیمی
قویما خوار اولسون جنازم یرده بی کس لر کیمی
قوی مزاره قارداشیندان دویمیان معصومه نی
منتظر عالمده واضحدور چتین جان تاپشیرار
خاصه غربتده ویره جان صاق صولا حیران قالار
منتظر عالمده واضحدور چتین جان تاپشیرار
بو شرردور ایمدی دلدن یاندیران معصومه نی
سن گیدندن قلبیمی هرآن دلر هجران اوخی
ایتدی شان شان سینه می بو درد بی درمان اوخی
باشیم اوسته صوتوین قربانی گل قرآن اوخی
چوخ چتین ساعتدی تک قویما بو آن معصومه نی
یوخ یانیمدا بیر کسیم اوز دردیمی اظهار ایدم
بو آدامسیزلیق غمی آرتور اورکده دمبدم
گور سزادی دلده بو نسگل شراری جان ویرم
یاندیروب آخر یاخا بو ناتوان معصومه نی
آز قالور آتسین فلک وادی هجره داشیمی
گل دیزون اوسته برادر آل بلالی باشیمی
اوز الونله ال لرون قربانی سیل گوزیاشیمی
بذل ایده قوی عارضونده چشمی جان معصومه نی
یازدیقون بو نامه دن یوخ اوزگه بیر مونس منه
همدمیم هم صحبتیم سن سیز بودور قربان سنه
گاه اوپوب گاه ایگلرم گلم فغان و شیونه
بیر سینان نی فرض ایدر هر بیر باخان معصومه نی
ایلیوب گاهی مخاطب دست خطون آغلارام
سویلدیقجه دردیمی آهیله سینه داغلارام
چشمه چشمی عذاره حسرتیله باغلارام
گورسن ایلرسن بو حالیله فغان معصومه نی
ال اورک باشیندا اولم ای شه والاتبار
ایتمرم گوزدن یوزه بیجا سرشگ غم نثار
ساخلارام بو دست خطون سینم اوسته یادگار
تا گورن فرض ایتمسون نامهربان معصومه نی
چکمرم پرده برادر بو اسفلی مطلبه
دوشمیشم بیجا دگیل جان اوسته من تاب وتبه
تابعیت ایتمیشم عمم وفالی زینبه
غملری آغلار قویوب بیر عمر عیان معصومه نی
باغرینا عمم نجه باسمیشدی قارداش کوینگین
قان قوروتموشدی توکوب اشگ ایلدی یاش کوینگین
یاتماسین تنها آپاردی قبره یولداش کوینگین
ویردی بو مشقی ایدوب درسی روان معصومه نی
باجیلار بو رسم عالمدور سولر قارداشی
قارداش آدی حک اولوب ایسترله اولسون باش داشی
ایلرم منده اودور بو نامه وی جان یولداشی
قبره یالقز قویماسون قبره قویان معصومه نی
سوز شعاع طول اولسا واضحدور ملاحتدن دوشر
مستمع خسته اولار شعرون حلاوتدن دوشر
اولی تکرار قیلسان سونکی حاجتدن دوشر
هارداسان ای چول لره عشقی سالان معصومه نی
مرحوم شعاع تبریزی
منبع مجموعه کانالهای مدح و مرثیه
----------- متن اشعار شعاع تبریزی ---------
در ولادت حضرت رسول اکرم (صلی الله)
چخوب شرق رسالتدن بو گون بیر شمس نورانی
منوّر ایلدی نور نبوّت کون و امکانی
طلوع ایتدی زمان صبحیده اول نیّر تابان
دوتوب یوز درگه ربّ جلیله سرور دوران
موحّد اولماقین ویردی ازلده عالمه اعلان
شهادت ویردی حقّه یاد ایدوبدور حیّ سبحانی
سالوب نور جمالی مکّه دن شامه ضیا یکسر
تجلّی ایتدی جمله قصرلرده نور پیغمبر
ویروبدور عصر ظلمتده صفا دنیایه اول سرور
قویوب دوردومجی گوگده واله و حیران مسیحانی
ویروب امر خدائیله ملکلر گوگلره زینت
جهالت رکنی سیندی، پاره لندی پرده ی ظلمت
ایدنده برج رحمتدن طلوع بو شمس حریّت
چکیلدی نقشه ی کفره اودم بیر خطّ بطلانی
اولوب نور خدا ظاهر او ساعت مه جبینینده
نمایان ایلدی اوز قدرتین خالق حبیبینده
یقین خورشید تابان منفعل اولدی طلوعینده
گورنده سربسر آفاقی دوتموش نور رحمانی
ایدوب نور نبوّت پایه پایه اوج افلاکه
دوشندی رحمتاً للعالمینون رحمتی خاکه
شعاع حسنی چون سالدی شفق هر بیر دل پاکه
سیلیندی مومنین قلبی گیدوبدور رنگ نقصانی
قویان وقته قدم بو عالمه چون شافع محشر
بروزه گلدی بو عالمده بیر اوزگه غرائبلر
ظهور ایتدی عجائبلر، قالوب حیران نوابغلر
ویرنده هاتف غیبی او اثناده بو اعلانی
قویوب اهل زمین ایچره محمّد اسمینی سرمد
خطاب ایلر سماوات اهلی بو شاهنشهه احمد
شفیع روز رستاخیز ابوالقاسم لقب امجد
بو شهدن خاطره الله آچوبدور باب احسانی
هدف اولدی بو گون تیر شهابه لشکر شیطان
وروده اولمادی بیرده سماواته داخی امکان
دوشوب بو ماجرادن حیرته ابلیس اولوب حیران
خیال ایتدی قیامتدور، قوروب حق عدل میزانی
یخلدی ناگهان شاه عجم تخت ریاستدن
اودم آتشکده خاموش اولوب دوشدی حرارتدن
بو یاندا خشک اولوب دریاچه ی ساوه او ساعتدن
اثردن دوشدی سحر ساحران، ختم اولدی دورانی
صنملر یکسره بتخانه لرده سرنگون اولدی
تزلزل ایلدی ایوان کسری واژگون اولدی
بو گوندن کاهنان سحرگر خوار و زبون اولدی
دوتوب وحشت همان لحظه دل ناپاک دونانی
دل آچدی ذکر حقّه جمله خلق ماسِوا یکسر
بو گلدن تاپدی زینت گلستانلار، عطر آلوب گللر
یره نازل اولوب تا دسته به دسته ملائک لر
بیر اوزگه عالم اولدی دوتدی رحمت سطح غبرانی
او رحمتدن سماوه وادسینده آب اولوب جاری
او یر که مین ایل اوردا اولمادی اصلا سو آثاری
اولان بو نعمت عظمالرین جمله سبب کاری
وجود پاک ختم الانبیادور اول وفا کانی
نسیم رحمت اسدی گلستان دین اسلامه
یتیشدی جاهلیّت بربریّت عمری اتمامه
یتوردی امّت مرحومه نی لطف خدا کامه
ایدوب نازل رسول اکرمه آیات قرآنی
کناره چکدی اهل عالمی بحر ضلالتدن
طریق عزّته سوق ایلدی راه جهالتدن
اولان پیرو سعادت تاپدی بو کان عدالتدن
عزیز عالم اولدی درک ایدوب فردوس رضوانی
چکوب دین اوسته ختم انبیا چوخ رنج بی پایان
دوزوب هر بیر جفایه، قویمادی تبلیغیده نقصان
دیوب احکام دینی خلقه، غفلت ایتمدی بیر آن
ئولونجه ایلدی اسلامه دعوت اهل دنیانی
نلر چکدی الیندن امّتین بولمز مگر الله
ایدردی سنگسار اول نازنینی فرقه ی گمراه
حقیقتدن ایدن وقته او شه مشرکلری آگاه
اونا نسبت ویروب وحشی جماعت کذب و هذیانی
گیچنده رهگذردن هر زمان پیغمبر رحمت
سپردی باشینه کول باملردن رحمسیز امّت
توکوبلر خار ایاقی آلتینا چوخ ویردیلر زحمت
گینه رافتله تبلیغات ایدردی قوم نادانی
مبارک قلبی بو امّت غمینده برملا دولدی
جمال بی مثالی برگ گل تک غصّه دن سولدی
دگوب سنگ جفا دندان زیباسی شکست اولدی
بویاندی قانیله آخِر لبان گوهر افشانی
نه قدری اینجیدی، دوزدی دایاندی جور اعدایه
شکایت ایتمدی هرگز حضور حیّ یکتایه
مقام صبریده دوردی ایدونجه رحلت عقبایه
قویوب حیرتده صبری آدم و ایّوب و موسانی
«شعاع» یازدوقجا گوزیاشون آخور رخساره چون باران
مصیبت یازما بو گون عیددور اولما بیله گریان
گوزل بیر عیدیانه ایسته حضّاره سنه یزدان
نصیب ایتسون حسینون قبرینی هر وقفه قربانی
مرحوم شعاع تبریزی
منبع مجموعه کانالهای مدح و مرثیه
----------- متن اشعار شعاع تبریزی ---------
در مدح حضرت علی (ع)
اگر رفیق اولا توفیق و لطفِ ربّانی
الیمده خامه یازار لفظ دُرّ مرجانی
اولار که قائل اولوبلار علی ولایتنه
ایدوبله درک مقامِ ولیّ یزدانی
بو حِصن امنه دوشن معتصم بِحَبل الله
اولنجا حشر یقین بوشلاماز بو دامانی
ویرن نجات ایکی دنیا تمام ماخلقه
علی ولایتیدور وار دلیل و برهانی
ثبوتِ عرضمه لازم گلور که شرح ویرم
بو بزمِ قربده بیر مطلبِ غم افزانی
وار اشتهاری تواریخده یازان چوخدی
دیولسه تک تک اولور نقل و شرحی طولانی
یازانلارین بیری دارُالسَّلام صاحبیدور
که اهلِ عالم آرا وار مقام و رجحانی
ثِقاتدن سایلور اهلِ عِلمه علّامه
فقیه شهرتی نوری او مردِ روحانی
یازار زمانِ سلفده واریدی بیر ملعون
که چوخ بخیلیدی سویمزدی آل ِطاهانی
عداوتندن همیشه او ناصِبی مذهب
دوتاردی دشمن اورکدن علیّ اعلانی
واریدی پردهء عصمتده بیر نجیبه قیزی
سویردی دلدن او قیز لیک شاه ِمردانی
علی محبّتی دوتمشدی قلبنی گویا
باباسی درک ایلمشدی او سرّ اخفانی
ویرردی گونده ایکی قرص نان فقط قزینا
طعامه قویمشدی حسرت اول دل آرانی
قالار نه حاله طعامه قالان بالا حسرت
یقین بلر بالا نازین چکن بو معنانی
اگر چه یوخدی کتبده بو سوز بیله بلورم
یتیمیمش آنادان ، چکدی بو بلایانی
گلوب دایاندی او گونلرده بیر نفر سائل
او ناصبی قاپوسیندا اولوب بو عنوانی
علی یولیندا دئدی ایلیون منه احسان
رضا اوزوزدن ایدون کردگارِ یکتانی
علی آدین ایشدنده او پاکدل دختر
گوگلده جوشه گلوب رأفتِ فراوانی
ویروبدی حصّه سنی سائله قیلوب خوشحال
خدا یانیندا ایدوب اخذ اجر ِشایانی
ولی یتشدی همان لحظه سنگدل آتاسی
بلوب معاینه واردور بر امر پنهانی
گورنده سائل الینده دئدی بو قرص لری
ویروبدی کیم سنه بیله دوتوبدور ارزانی
جواب ویردیکه بر قیز همین بو منزلدن
منه ترحّم ایدوب ویردی بو ایکی نانی
خراب اولان ایوینه داخل اولدی اول مرتدّ
قزیندان ایستدی توضیح ، دشمنِ جانی
سوروشدی قرص لری سائله نچون ویردون
دیوبدی صدقنی بیلدی حرام ، کتمانی
دئدی بابا منی بیر نام پاکه ویردی قسم
او نام حرمتنه ایلدیم بو احسانی
سؤال ایتدی او کیمدور دئ ، سویلدی باباجان
علی ولیّ خدادور ، مروّتون کانی
دئدی علینی سویرسن مگر ، بیوردی بلی
هزار جانیم علینون اولیدی قربانی
گوتورمدی ال او کانِ ادبدن آلدی خبر
که ایتدون هانسی الونله او بذل و اعطانی
ویروب نشان صاق الین یعنی بو الیمله بابا
عزیز دوتمشام اسمِ علیّ عمرانی
محبتنده علینون صدیقسن دئدی قوی
الون کسیم یوخ اگر ادّعاده نقصانی
علی یولوندا دئدی ویرماخ ال چوخ آساندی
بو ظلموین منه وار لیک عیبی خسرانی
ترحّم ایله منه ، ایتمه ناقصُ الاَعضا
آتا بالاسینا ایتمز بو ظلمِ بیجانی
روا دگل منی محتاجِ خلق ایلیه سن
اماندی ایلمه سائل بِکف بو نالانی
نقدری ایتدی او بی دینه التجا امّا
گنه ایدنمدی قانع او کلبِ نیرانی
علی عداوتنه کسدی صاق الین قیزینون
ایویندن ایلدی خارج او ماه سیمانی
قویوب او حالیله یوز هولدن بیابانه
یاناردی نارِ جفائیله قلبِ سوزانی
یتوردی تا اوزونی بیر آغاج کنارینه
اوتوردی لیک اوجالدی سپهره افغانی
کسیلدی تابِ توانی یخلدی غش ایلدی
گتوردی داده نواسی وحوش ِصحرانی
او گونکه گونده قضارا همان او ناحیه نون
شکاره چخمشیدی سیر ایدردی سلطانی
نه گوردی بر گوزل آهو گزر بیاباندا
بو فکره دوشدی شکار ایلسون او حیوانی
دوشوبدی آردیجه تا بیر یره یتوب گوردی
او یردن اوج ایدر افلاکه نورِ رخشانی
همان او نخله که اوردیدی قیز اولوب ظاهر
سالوب تفکّره بو قصّه شاهِ دورانی
باخاندا دقّتیله گوردی جمعِ وحشِ صحار
ایدوبله جمله احاطه او غملو ماوانی
دوتوبلا یوز گوگه ایلولّه ناله و شیون
توکولّه گوزیاشی مثل سحابِ نیسانی
گورنده شاهی پراکنده اولدولار یکسر
بو ماجرانون اولوب شهریار حیرانی
پیاده اولدی آتندان شتابله سلطان
گوروب کسوبله الین بیر قیزین ، آخور قانی
کمال رأفتیله باغلادی اونون النی
گتوردی حاله او مظلومه پریشانی
گلنده حاله سؤال ایتدی شاه ماوَقعی
بو سِرّ مبهمه لازم بولوبدی افشانی
دئدی قضیه نی بیر بیر بلوب او عادل شه
ندن ایدوبلر اونا ظلمِ تاب فرسانی
دئدی غم ایلمه اولّام سنه آتا عوضی
اله گتوردی بو سوزده رضای رحمانی
واریمدی بیرده بیر اوغلوم بو دارِ دنیاده
که ایلرم سنی تزویج اونا ، وار امکانی
خلاصه ایلدی لشگرگهه او دم رجعت
سپاهه وردی همان لحظه کوچ فرمانی
بیوردی ویردیله ترتیب محملِ مخصوص
سوار ایدوبله او حوری خصالِ زیبانی
سُرور و وجدِ تمامیله یتدیلر شهره
حرمسراسینه گوندردی شاه ، مهمانی
گجه عبادت ایدردی گونوز دوتاردی اوروج
سالوردی حیرته زهدی حرمده نسوانی
دولاندی دوره گچوب روزگار او وقت اولدی
شهون تمام اولا اوّلکی عهد و پیمانی
اوز اوغلونا دئدیگی تک اونی ایدوب تزویج
زفاف بزمی قوروب ، دعوت ایتدی اعیانی
گیدوب عروسیله داماد طوی اطاقینه
ضیافتین او زمان که یتشدی پایانی
هامی گیدوبدی ولی شاه پشت درده دوروب
اولوب زفاف ایوینون ناظر و نگهبانی
بو فکردیدی گر ایراد عروسه دوتسا الین
ویروب تسلّی اونا خیر ایشه اولا بانی
بیر آز زمان سووشوب شاهزاده ایستدی سو
ولی عروس گتوردی صول اللی صَهبانی
گوروب او حالی مزاحیله شاهزاده دئدی
آچیخ اولا آتامون لطف و مرحمت خوانی
منه ویروبدی بیر عورت که صاق صولون تانمور
مشخص ایلیه بلمور یَسار و یُمنانی
ایشتدی بو سوزی تازه عروس غملندی
سرشگ خجلتله دولدی چشم ِگریانی
عروس حالنی گوردی پوزوب بو سوز داماد
ادب یولیله اولوب فعلینون پشیمانی
فراشه داخل اولوب تازه کدخدا یاتدی
او حالِ یأسیله قویدی او بختی والانی
عروس گوردیکه بی اعتنا یاتوب داماد
گلوب تموّجه قلبنده بحرِ احزانی
دوروب ایاقه گوزی یاشلی دستماز آلدی
نماز قیلماقا وادار ایدوبدی ایمانی
ادا ایدوب ایکی رکعت نماز صدقیله
ایدوبدی یاد خداوند ِکون و امکانی
اوقدر سجده ده گوزیاشی توکدی غش ایتدی
گتوردی موجه غمی بحرِ لطفِ رحمانی
سمادن اوندا گوروب نور ساطع اولدی یره
منوّر ایلدی افلاکی سطحِ غبرانی
ایکی بولوندی همان نور گوردی بیر تختی
وقاریله اوتوروب بش وجودِ نورانی
بیری اناثیدی ، دوردی ذُکور او بش نفرین
همان خانیم ایلدی درک او ماه سیمانی
باسوبدی سینیه ، باشه یتوب بیوردی غمون
داخی سیزیلداما یاندرما قلبِ زهرانی
منم بتول ، بابامدور بیری او دوت نفرین
بیری عم اوغلوم علیدور هدایت ارکانی
بالام حسندی اوچومجی ، بیری حسینمدور
اولان اولاردی جوانان اهل رضوانی
دوتوب خانم یوز او دم میرِ مؤمنانه دئدی
عم اوغلی یاعلی ای جمله درد درمانی
سنون یولوندا الیندن گچوب بو کانِ وفا
قویاق سزا دگی خجلتده بو پریشانی
گَل ایمدی ایله دعا حق اجابته یتوره
ویره شفا الینه ، حل ایده معّمانی
بو سوزده دوتدی مبارک الین سمایه طرف
سالوبدی حیرته بو معجزه مسیحانی
بیر ال گتوردی الینده ویروبدی زهرایه
بیوردی آل بو یَدِ بیگناه عصیانی
قویوب قیزون الینه آغزیوین لعابنی چک
تلاوت ایتگله امّ کتاب ، قرآنی
همان او طرزیله رفتار ایدوب حبیبهء حق
قوتاردی قیدِ محندن او دختِ ترسانی
شفا تاپوبدی عروسین الی همان ساعت
قایتدی اوّله ، ترک ایتدی حالِ اُخرانی
او دم اولوب نظرندن او بش نفر غائب
قاپو دالیندادا شه بولموری قضایانی
گوروب خموشیدی طوی حجله سی اولوب دلتنگ
آچوب قاپونی گوروب حجله گاهی ظلمانی
اویان طرفده یاتوب رختخوابده داماد
گوروب بویاندادا مدهوش او مو سمن سانی
قضای جاریه دن عطسه شاهه غالب اولوب
گتوردی هوشه او عطسه کنیز عذرانی
گورنده سالم الین اولدی شاد شاه و عروس
گتوردولر یرینه شکرِ حیّ منّانی
دیوب قضیّه نی شاهه تمام تازه عروس
او طرزیلن که ایشتدون عطای مولانی
سُرور و وجدیله شه حجله گاهدن چخدی
مبدّل ایلدی حق ، وصله درد ِهجرانی
یازاندا تازه گلین لفظین آه یا زهرا
الیمده نامه نی ایسلاتدی اشک بارانی
هایاندا قالمشیدوز ای شفیعهء محشر
ووروب یخاندا عروسی گروهِ سفیانی
دیارِ کرب بلاده گلوب گوریدوز ببر
سپاهِ شام ایدن جور و ظلم و ایذانی
عروسی کیم ووروب عالمده کعبِ نیزئیله؟
تزلزله گتوره ظلمی عرش ِمینانی
گلوب گوریدوز عروسین قولاقدا یاره سینی
و یا قولیندان آچیدوز طنابِ خذلانی
مطوّل اولدی (شعاع) سوز داخی تمام ایله
بو محنتی دیوب آغلاتما شاه ِبطحانی
سزادی عرض ایده سن یاعلی و یا زهرا
قالا گوزیمده رضا اولمیون بو اهوانی
عروس قاسمه خاطر گلون باشیم اوسته
زمانِ موتیده ، من ترک ایدنده دنیانی
غریق بحر گناهم یامان دمیمدور او دم
گوزوم یوزوزده ویریم جانستانه بو جانی.
مرحوم شعاع تبریزی
منبع مجموعه کانالهای مدح و مرثیه
----------- متن اشعار شعاع تبریزی ---------
در شهادت امیرالمومنین حضرت علی (ع)
بو گئجه مهماندی شیر لم یزل اطفالینه
نازنین قلبی یانار اما حسینین حالینه
چون اوزی آگاهدی واردور باشیندا نه
درد هجران عترتین ایلر بلایه مبتلا
دردینه عالم طبیب اولسا ائده بولمز دوا
اهل کین نائل اولار ظاهرده شوم آمالینه
گه باخوب آغلار حسینه حجت جان آفرین
وارباشیندا نه بلا آگاهیدی یعسوب دین
گه سالوب آغلاردی یاده ماجراسین زینبین
گوزده وئرمیشدی اودی رخصت سرشگ آلینه
بیر حسینی که اونی نازیله بسلردی مدام
پرورش وئرمیشدی عزتله اونا خیرالانام
سوکنارینده سوسوز باشین کسرقوم ظلام
بذل ائدر انگشتیله انگشترین جمالینه
گه باخوب کلثومه آغلار شافع روز جزا
نه چکر جور عدودن نور عین مجتبا
آزقالور سالسون آرایه آیریلیق دست قضا
حشرده آیت اولا بلقیس رو اطفالینه
بو گئجه واردور کواکبده بیر اوزگه انقلاب
انجمن ایلوب نجوم لامعه آغلار سحاب
ایستوری باتسون سپهر حقده بو آفتاب
دوشسون عالم جوروظلمون ظلمت ابطالینه
اوخشارایمدی دودمانی عرصه گاه محشره
کیم وئرور بولمم تسلی عترت پیغمبره
کیم طبابت ایلوری یا زخم فرق حیدره
آغلار اهل ماسوا شاه نجف احوالینه
ایمدی باخدوقجا یانورعباسه شاه لافتا
یا بالا گوردوقجا ضعف ایلورآتاایلورنوا
خانه زنبوره بنزردودمان مرتضا
عالم آغلار بیر جفاکارین او بد افعالینه
یانه یانه سویلرای نوردوعینیم آغلاما
اولماراضی دلده آرتا شورشینیم آغلاما
کربلایه ساخلاگوز یاشون حسینیم آغلاما
اوندا کی مغلوب اولارسان امتین جهالینه
یوز دوتوب آغلارگوزیله زینب خونین دله
وئرحسینیله بویوردی کربلاده ال اله
زورق کفری عدم بحرینده غرق ایله گله
وئرحیات جاودان اسلامون استقلالینه
آغلاما ساخلا بو گوز یاشین بلا صحراسینه
غرق اولان گون آغلاسان آلام و غم دریاسینه
لیک گوز یاشون وئرردینون صفا سیماسینه
چونکه سنسن عمده باعث کفرون اضمحلالینه
ای (شعاع)دنیاده خوش ساعت اوساعتدور که سن
واجبات دینووه اولده اقدام ایله سن
آغلاسان بیرده حسینه آغلا یان تا زنده سن
بو گوزل نیتدی چیخ صدقیله استقبالینه
مرحوم شعاع
منبع مجموعه کانالهای مدح و مرثیه
نظرات (۰)
هیچ نظری هنوز ثبت نشده است