متن نوحه ترکی عدلجوی تبریزی

مجموعه اشعار برگزیده آیینی و مذهبی استاد عدلجوی تبریزی در مدح و رثای اهلبیت علیهم السلام ، متن نوحه ترکی از استاد عدلجو

--------

شام غریبان حضرت امام حسین (علیه السلام)

 

شام غریبان حضرت امام حسین (علیه السلام)

 

باتدی گون گلدی گئجه باغریم اولوب قان یارالی

من سنه هاردا دوتوم شام غریبان یارالی

یارالی جان یارالی قاننه غلطان یارالی

زینبون جانی اولا جانیوه قربان یارالی

 

هله عریان بدنون یرده پریشاندی حسین

بو غموندن اوره گیم لاله صفت قاندی حسین

اوت ویریب کوفه لیلر خیمه لریم یاندی حسین

من سنه هاردا دوتوم شام غریبان یارالی

 

شرح ائدیم هانسی غمی . دلده غمیم چوخدی حسین

هر غمیم بو یارالی قلبده بیر اوخدی حسین

بیر چادر وئرمه سه سعد اوغلی ائویم یوخدی حسین

من سنه هاردا دوتوم شام غریبان یارالی

 

باغبان ئولسه حسین گللری گلشنده سولار

غم دوتار گلشنی بلبل اوره گی غمله دولار

رسمدیر هر ئولنون شام غریبانی اولار

من سنه هاردا دوتوم شام غریبان یارالی

 

قلبیم اکنده اولوب دردیله طوفان گئجه سی

شب وصلت قوتاریب .باشلادی هجران گئجه سی

یاس دوتالار ئولنه شام غریبان گئجه سی

من سنه هاردا دوتوم شام غریبان یارالی

 

بیر قوشام یاره لیم صید ایلیوبلر بالامی

نه یانان حالیمه نه خشک ایلین وار یارامی

اوچولار حمله ائدوبلر داغیدوبلار یووامی

من سنه هاردا دوتوم شام غریبان یارالی

 

گون باتاندان بو چولی زار و پریشان گزورم

بالالارون داغیلوب چوللره گریان گزورم

لانه سیز قوش کیمی اواره و ویلان گزورم

من سنه هاردا دوتوم شام غریبان یارالی

 

احد عدلجوی تبریزی

 

----------- متن اشعار استاد عدلجوی تبریزی ---------

حضرت امام حسین (علیه السّلام)

و گریز به غارت خیام

 

ای وجودی هر ایکی دنیایه زینت یا حسین

وی گوزل آدی منه تاج شرافت یا حسین

 

دل آچان گوندن گوزل آدون اولوب وردیم منیم

تاپموشام بو آدیله عالمده شهرت یا حسین

 

هر کسون بیر عشقی وار عالمده بیر معشوقی وار

عاشق و معشوق آرا وار آیری لذّت یا حسین

 

منده عاشق اولموشام عالمده مولاجان سنه

نیلیوم دل باغلیوب بیر سنله الفت یا حسین

 

بیر گدایم درگهونده روسیاه و موسپید

حاجتیم وار گلمیشم ای باب حاجت یا حسین

 

دردمندم ای طبیب دردمندان لطف قیل

ناامید ایتمه منی ایله عنایت یا حسین

 

گل منی قوما قاپوندان بیر یریم یوخدور گیدوم

وار کیمیم سندن صورا ای کان رحمت یا حسین

 

قطع اولوب امّیدیم هر یاندان امیدیم وار سنه

سنده ایتسن ناامید اولّام خجالت یا حسین

 

ایتمه سن سن ناامید، سن چونکه زهرا اوغلوسان

سن کرم دریاسی‌سان ایله کرامت یا حسین

 

بیر مریضم دردیمه دکتر ایلوبدور جواب

سن جواب ایتمه، منه ایله طبابت یا حسین

 

گوشه ی چشمونله بیر یول باخماقون بسدور منه

هر ایک دنیا منه ایلر کفایت یا حسین

 

عمرومون سرمایه سین بزم عزاده قویموشام

گوز آچاندان اولموشام من اهل هیئت یا حسین

 

خلق گیتدی باغ و سیره گزماقا من هیئته

مجلس یاسون منه اولدی سیاحت یا حسین

 

هر شب جمعه گیدوب هیئتده سینه داغلادیم

خلق امّا بسترینده یاتدی راحت یا حسین

 

خلق قوردی بزم شادی منده قوردوم بزم غم

گورموشم بو یولدا چوخ طعن و شماتت یا حسین

 

کیمسه صحبت ایلینده گلشن و گلزاریدن

منده ایتدیم کربلادن خلقه صحبت یا حسین

 

ویرمرم کرب و بلا توپراقینون بیر ذرّه سین

عالمین داراسینه، آزدور بو قیمت یا حسین

 

کربلانی ایتمرم باغ بهشتیله عوض

رشک ایدوب کرب و بلایه باغ جنّت یا حسین

 

آه او ساعتدن یخلدون قتلگاه عشقیده

شمر کسدی باشیوی قوپدی قیامت یا حسین

 

سعدین اوغلی ویردی فرمان لشکر غارتگره

ووردولار اود خیمه لر یاندی او ساعت یا حسین

 

حمله ور اولدی بنات حیدره سویقون چیلار

هم دوگولدی قیزلارون هم اولدی غارت یا حسین

 

خیمه لر یاندی بالا قیزلار داغیلدی چوللره

قمچی سین آلدی اله اهل شقاوت یا حسین

 

بعضی سی قالدی ایاق آلتندا نازلی قیزلارین

بعضی سی وحشتدن اُلدی وقت غارت یا حسین

 

بعضی سی واردور خبرده قالدی نخلستانیده

جان ویروب سوز عطشدن اولدی راحت یا حسین

 

قهرمان کربلا اوز دوتدی قانلی مقتله

سسلدی دور قیزلاروندان قیل حمایت یا حسین

 

ویر خبر عبّاسه قارداش خیمه می یاندیردیلار

دادیمه گلسون دینن شیر شجاعت یا حسین

 

«عدلجویم» درگه پاکوندا شاها بیر ایتم

گلمیشم سومسونماقا ایتمه خجالت یا حسین

 

احد عدل جوی تبریزی

منبع مجموعه کانالهای مدح و مرثیه

 

----------- متن اشعار استاد عدلجوی تبریزی ---------

زبانحال به  امام حسین (علیه السلام)

 

تانفسیم وار دییرم یا حسین

جان سنه قربان ایدرم یا حسین

 

عالم امکان منه گر ناز ائده

منده سنه ناز ائدرم یا حسین

 

چوخلاری دیوانه عشقوندولر

من ولی دیوانه ترم یا حسین

 

من دئمورم لایق درگاهیوم

عاشق شوریده سرم یا حسین

 

ویرسه لر عشقونده منه زهر اگر

شهد عوضینده ایچرم یا حسین

 

آدیوی گورسم یازیلوب توپراقا

مین یول او آدی ئوپرم یا حسین

 

شرک قرار اولماسا گر آللها

آدیوه سجده ائدرم یا حسین

 

چون آدون الله آدیدور-بی وضو

آدیوی ذکر ایلمرم یا حسین

 

قورسالا مجلس اوگوزل آدیوه

اوردا گیدوب گل سپرم یا حسین

 

مدح دیولسه سنه هر بزمیده

منده او بزمی بزرم یا حسین

 

دشمنوین دشمنی یم دشمنی

کیم سنی سئوسه سئورم یا حسین

 

یوخ بیلوسن عمرلره اعتبار

بیرگونی منده ئولرم یا حسین

 

قبره قویوب هامی گیدندن صورا

اوندا سنی گوزلیرم یا حسین

 

هرنه سوال ایله سلر قبریده

آیری سوزوم یوخ دیرم یا حسین

 

قبریمین اول گئجه سی گلمه سن

فاطمه جانی کوسرم یا حسین

 

«عدل جویم»غرق گناهم شها

سنله ولی مفتخرم یا حسین

 

استاد عدلجو

بجای عبارت "یاحسین"

از عبارت " یا علی " نیز میشه استفاده کرد

منبع مجموعه کانالهای مدح و مرثیه

 

----------- متن اشعار استاد عدلجوی تبریزی ---------

استمداد حضرت ابوالفضل (علیه السلام)

 

گردابدن ای نوحی چکن ساحله قارداش

گل چک منی ده ساحله ،دوشدوم گله قارداش

 

ائتموشدی ازلدن گوزل عشقون منی شیدا

بو عشقیله اولدوم شرف و عزته دارا

بو مدرک عشقی ایلدی فاطمه امضا

بولدوم که چاتوب کام دلیم حاصله قارداش

 

بیر عمر منیم ذکریم اولوب صحبت عشقون

افزون ایلیوب عزتیمی عزت عشقون

هاردان هارا گور چکدی منی دولت عشقون

زهرا دیدی اوغلوم منه مین فخریله قارداش

 

عشق عالمینون عالمینه چاتماز هیچ عالم

عالم ندی،مین عالمه عالم دی بو عالم

عشقوندی ایکی عالمیم ای قبله ی عالم

من سنله خوشام مین بیله عالم گله قارداش

 

عشقون مددینندی منه فیض شهادت

اولماز اولا هر کیمسیه بیر بیله سعادت

تاپدیم ایکی دنیا گوزل عشقونله شرافت

ویردیم باشا اوز عمرومی بو عشقیله قارداش

 

بیر عمرودی وار عشقیویله سوز و گدازیم

عشقونله بو دل چرپنوب ای محرم رازیم

بیر قلبیده کی اولمادی عشقون نیه لازم

عشقوندی ویرن ذوق و صفا هر دیله قارداش

 

عاشق اودی عشقونله سنون جان ویره مولا

باشدان گیچه تا ایلیه اوز عهدینه ایفا

بیر گوز،ایکی قول ،پارچالانان باش ویره حتی

گوز اوسته ده اوچ شعبه لی پیکان هله قارداش

 

عشقونده نه ئولماخ ،دیریلیقدور بیله ئولماخ

واللهی شرفدور بیله قربان سنه اولماخ

واجبدی عبادت کیمی مولا سنی بولماخ

حجین قوتاروب کیم سنی مولا بوله قارداش

 

عشقونده سعادت بو بلا چکماقی بوللم

فخریم بودی عشقونله سنون جان ویریب اوللم

یردن دورا بولسم گینه پابوسیوه گللم

عباسیوی قویمور داش آتانلار گله قارداش

 

ای حجت خلاق بشر ،وی شه ذوالمن

باش ویرمرم اغیاره بو باش صاحبی سن سن

مینلر بله عشقونده بلا گلسه خوشام من

حاشا ائده عباسیوی غمدن گله قارداش

 

تشریف گتورسن سنه چوخ دیلده سوزوم وار

بو آیریلیقا منده نه صبر و نه دوزوم وار

عالم باشیمون اوسته گله سنده گوزوم وار

گل بلکه بو یورقون بدنیم دینجله قارداش

 

ای کاش گلوب سایه وه بیر دالدالانیدیم

پروانه صفت شمع وصالونده یانیدیم

چوخ ایستوری گویلوم باشیوا بیر دولانیدیم

جانین قاداسی جانیمه بلکه گله قارداش

 

هرگز دیمورم گل منی گور سینه وی داغلا

اگلش دیمورم باشیمین اوسته منه آغلا

لطف ایله گل سن اوزون یاره می باغلا

چاتماز هیچ الین لطفی ایله بیر اله قارداش

 

گل گور نه یامان درده سالوبلار منی قارداش

دوشسون بو یامان درده گوروم دشمنی قارداش

عالم منی داده چاغیرار منی سنی قارداش

گل بیرده باخیم فاطمه منظر گله قارداش

 

هرگز دیمورم گورماقا اعدانی گوزوم یوخ

گیتسون سنون عشقینده بو صول گوزده سوزوم یوخ

بوندان چوخ آقا آیریلیقا منده دوزوم یوخ

گل قویما بو هجران تاپا چوخ فاصله قارداش

 

بیر تیر جفا گلدی دل مضطره دگدی

بیر اوخدا گلوب دیده خونین تره دگدی

سو مشکیمه اوخ دگمدی ،اوخ اصغره دگدی

دشمن بو اوخی ویردی او عطشان دیله قارداش

 

گلموش باشیمین اوستونه بیر بانوی خسته

قدی بوکولوب ،بیر قولی پهلوسی شکسته

چوخ زحمتیله باشیمی آلموش دیزی اوسته

راضی دگولم زحمته دوشسون بله قارداش

 

ایستور سیله گوز یاشیمی اما قولی قاخمور

بو دردی یانان قلبیمی غمدن دیمه یاخمور

مندن یوزونی گیزلدیر ،آغلیر ،منه باخمور

دینسه بولرم دردینی گلمور دیله قارداش

 

زهرا آناوین عطری دوتوب کرب و بلانی

گل سنده ایکی گلدن آلیم عطر جنانی

مندن چوخ آنان تله باخیر فاطمه جانی

گویلون آناوی ایسته سه گل مقتله قارداش

 

مین یول ئولوب ای کاش ویرم جان سنه خاطر

مین یول سارالام گل کیمی بیر گلشنه خاطر

چیخسون بو قالان گوزده دیسم گل منه خاطر

گل آل آناوین گویلونی من هیچ هله قارداش

 

وار علتی امداده سنی سسله ماقیمدان

منظور،اطاعت ایلیم امر آناندان

قارداش دیمه میشدیم سنه قارداش دل آچاندان

زهرا آناوین امریدی گلدیم دیله قارداش

 

بیر حالدیم احوالیمه دلدن یانان آغلار

من آغلارام اوز حالیمه قارداش ،آنان آغلار

شرمنده اولان شخص بولورسن یامان آغلار

گل گور نجه گوزیاشیمی دونموش سیله قارداش

 

سقادور آدیم مشکی ده یوخدور سویوم اما

اطفالیوه تاپشور دیمه سینلر منه سقا

قویدوم نجه عطشان بالالارون گوزی یولدا

اولمز نجه عباسیوی بو دردیله قارداش

 

اوخ مشکه دگنده سارالوب گل کیمی سولدوم

گوز یاشیم آخوب ابر بهاران کیمی دولدوم

دنیا بویی اصغر آناسیندان خجل اولدوم

قبریمده ده یانام بله بیر نسگله قارداش

 

نوح عمروم اولا ،بد غمه یاننام گیجه گوندوز

قویدوم نه یامان گونده آقا من سنی یالقوز

دشمن بو بیابانی دوتوب ،سن بیر اوغول سوز

گلمزدی خیاله بله بیر مسئله قارداش

 

حق لطفی اولوب (عدلجو) چون حالیوه شامل

علت اودی اشعارون اولوبدور بله قابل

گر ساده اولوب ،ساده سوزه دیل اولی مایل

سوز ساده یازیلسا اوتورار هر دله قارداش

 

احد عدلجو تبریزی

 

----------- متن اشعار استاد عدلجوی تبریزی ---------

سلام اولا او پرچمه

 

سلام اولا او پرچمه  که نقش اولوبدی یا حسین

سلام اولا او پرچمه فرشته لر، یازیب اونا شهید کربلا حسین

 

سلام اولا او پرچمه سپاه دین لواسیدی

اوپرچمین محبتی اورکلرین صفاسیدی

 

سلام اولا او پرچمه اوپردی صاحب علم

دئیردی دوشمه تپراقا باخیر امام ذوالکرم

 

سلام اولا او پرچمه که دینون اقتداریدی

او شیعه نون وقاریدی او عشقین اعتباریدی

 

سلام اولا او پرچمه دوشوبدی دللره سوزی

باخاردی تلّدن اونا حسین و زینبون گوزی

 

سلام اولا او پرچمه چکوبله عرش اعظمه

علینون اوغلی نصب ائدیب کنار نهر علقمه

 

سلام اولا او پرچمه اوپردی سرسپاه دین

دئیردی اَسمه صاق صولا،باخیر سنه آقام حسین

 

سلام اولا او پرچمه اوجاتدی شیر تشنه لب

همان او پرچمه وئریب خرابه شامه زین اَب

 

سلام اولا او پرچمه وئروبدی دینه آبرو

او پرچمین جلالتین ائدر،ملک لر آرزو

 

سلام اولا او پرچمه که اوندا وار حسین آدی

ساچوب کنار نهرده علینون اوغلی قوزادی

 

سلام اولا او پرچمه اسنده قلبلر اَسَر

وئریلسا هر گذرگهَه،حسین چیلر گلوب اوپر

 

سلام اولا او پرچمه که آبروی شیعه دی

همیشه اهتزاز ائده بو آرزوی شیعه دی

 

سلام اولا او پرچمه دوشنده اوپدی مرکبین

حسینون اسدی دیزلری سارالدی رنگی زینبین

 

سلام اولا او پرچمه شه جهانی آغلادیب

نه تک حُسینی خاتم پیمبرانی آغلادیب

 

سلام اولا او پرچمه که دینی ائتدی سرفراز

او پرچمین بقاسینه همیشه زنده دور، نماز

 

سلام اولا او پرچمه اسنده داغ داش آغلادی

بویاندا قارداش آغلادی اویاندا قارداش آغلادی

 

سلام اولا او پرچمه حسین باساردی باغرینا

توکردی گوز یاشین یوزه بلینده ال یانایانا

 

سلام اولا او پرچمه قوتاردی عمرون اصغرین

دوشنده تپراقا حسین بِلینه قویدی اللرین

 

سلام اولا او پرچمه دل جهانی داغلادی

دوشنده یولدا تپراقا خمیده قیزلار آغلادی

 

سلام اولا او پرچمه دگنده یل او پرچمه

اسردی قلبی زینبون رباب ائدردی واهمه

 

سلام اولا او پرچمه سالاردی لرزه دشمنه

باخاردی تلدن حسین دئیردی آفرین سنه

 

سلام اولابو پرچمه باخاندا قلبلر یانور

ندا، ائدیر ملکلره حسین عزاسی باشلانور

 

سلام اولابو پرچمه صفای عاشقاندور

بو پرچمین نشانه سی اوپرچمین نشاندور

 

سلام اولابو پرچمه ندای محنت ائلیور

شهیدعشق عاشقین عزایه دعوت ائلیور

 

سلام اولا بو پرچمه بو پرچمی اوپن لره

بو پرچم محبته حسین آدین تیکن لره

 

سلام اولا بو پرچمه آقام حسینون عطری وار

بو پرچمیله « عدل جو » حسین عزاسی باشلانار

 

 احدعدلجو تبریزی

 

----------- متن اشعار استاد عدلجوی تبریزی ---------

 بقیع

 

ای بقیع قبر گُل طاها کجاست

قبر پاک همسر مولا کجاست

 

من به شوق یار مولا آمدم

عُقده ها از دل کنم وا ، آمدم

رو نَهم بر قبر زهرا ، آمدم

ای بقیع گو ، مرقد زهرا کجاست

 

من چگونه عُقده دل وا ، کنم

دردِ دل را ، با که من افشا کنم

قبر ، زهرا را کجا پیدا کنم

مرقد صدیقۀ زهرا کجاست

 

ای بقیع کو ، قبر دلدار علی

آن انیس و مونس و یار علی

کو ، مزار یار بیمار علی

قبر ، آن یار شه والا کجاست

 

ای بقیع ای گُلستان غم فزا

ای به درد مرتضی را آشنا

کو ، مزار یادگار مصطفی

قبر نور دیدۀ طاها کجاست

 

ای بقیع ای مدفن جان علی

کو ، مزار جان و جانان علی

از تو آید آه و افغان علی

قبر جان حجّت اعلا کجاست

 

احد عدلجوی تبریزی

 

----------- متن اشعار استاد عدلجوی تبریزی ---------

زبانحال حضرت زینب  (س)

در احوالات حضرت علی (ع)

 

تاپولمادی نه ایدیم دردوین دواسی بابا

ساغالمادی او گوزل باشوین یاراسی بابا

 

شل اولسون اللرینی باشیوا یارا ویرانون

گتوردی درده منی دشمنون جفاسی بابا

 

آنام ئولنده فلک باشیمه قرا سالدی

آچلمیوبدی هله باشیمین قراسی بابا

 

او قانلو گوزلره قربان اولوم ٫ ندن یومولوب؟

گلیدی گوزلروین جانیمه قاداسی بابا

 

او گل کیمی سارالان رنگوه قیزون قربان

بلالی جانیم اولا جانوین فداسی بابا

 

او قانلو گوزلرون آچ ؛ بیرده باخ سولان یوزومه

چخوبدی زینبوین گویلره نواسی بابا

 

سنی بابا ، آنامین دردی درده سالموشدی

تاپولمادی اودی کی دردوین دواسی بابا

 

ایدردی دردیوه چاره آنام صاق اولسیدی

سنه چوخیدی او مظلومه نین وفاسی بابا

 

آنام ئولندن ایله غم اسیری اولموشدون

دیردون عالمین اولماز منه صفاسی بابا

 

آنامی ثانی ویراندان ؛ سولوب سارالمیشدون

او گوندن اولموشدون غملر آشناسی بابا

 

ئولومین آرزی ایدرین آنام ئولن گوندن

یوخیدی زندگیه قلبوین رضاسی بابا

 

شرار غمده یانوب شمع تک قوتولمشدون

قالوردی بیرجه فقط جسموین نماسی بابا

 

آنامی دوگدوله ، دوزدون رضای حقه گوره

عدالتون دیدون اولسون گرگ بقاسی بابا

 

سن ئولدون ، ئولدی عدالت یخیلدی خانه دین

فلکین آخر اله گلدی مدعاسی بابا

 

 احد عدلجوی تبریزی

منبع مجموعه کانالهای مدح و مرثیه

 

----------- متن اشعار استاد عدلجوی تبریزی ---------

 زبانحال حضرت زینب (سلام الله)

به مادر بزرگوارش در فراق پدر

 

بقیع دن گل کوفه شهرینه گوز یاشیم دونوب قانه آی ننه

آتام ئولوب گل ننه بالا اوخشیاق یانه یانه آی ننه

 

ئولنده سن بش یاشیندا من باشیمه قرا سالموشام ننه

فلک سالوب آیری بیر قرا غم غم اوستونه آلمیشام ننه

سنه گیجه غسل ائدن ئولوب گل یامان گونه قالمیشام ننه

هایانداسان گل عم اوغلووا قورموشوخ عزاخانه آی ننه

 

یاناندا درگاهیمیز ننه قوللارین دشمن باغلیان ئولوب

سنون غمونده گجه گوندوز سینه سین ننه داغلیان ئولوب

بقیعده قبرون کنارونده هرگئجه سنه آغلیان ئولوب

اوگوزلر که آغلیوب سنه اولدی قانی پیمانه آی ننه

 

حسینون آغلور هایانداسان تسلیت ئوزون گل وئر اوغلووا

ئولوب سنی چوخ سوون علی گل ئوزون ننه اوخشا یارووا

بابام سنه چوخ عزا دوتوب سنده گل عزا دوت عم اوغلووا

سنه عزا ساخلیان ئولوب گل باتوبدی القانه آی ننه

 

اگر چه چاتمازدی دهریده بیر نفر اونا صبریده ننه

سنون غمون آلدی صبرینی یاندی آتش جبرده ننه

سنی گجه قبره تاپشوران یاتدی بو گجه قبریده ننه

بابامدا دویموشدی سن کیمی درد وغصه دن جانه آی ننه

 

بیر عمر غم غصه یورقونی بو گئجه ننه چاتدی ایمنه

قویولارا دردینی دیئن گلدی دردینی سویلدی سنه

یاراسین من باغلیانمادیم باغلا یاره سین سن ئوزون ننه

بو کوفه ده سن مدینه ده باتدوز هر ایکیز قانه آی ننه

 

احد عدلجوی تبریزی

 

----------- متن اشعار استاد عدلجوی تبریزی ---------

مناجات

 

بنام خداوند لوح و قلم

که او هست و عالم سراسر عدم

 

به نام خدائی که عالم ز اوست

که آدم ز او هست و خاتم ز اوست

 

به نام خدائی که جان آفرید

ز رحمت به جانها،جنان آفرید

 

به نام خدائی که خلقت ز اوست

محبّت ز او هست و رحمت ز اوست

 

ز سبحانیش صبح و شام آفرید

جهان را به نظم و نظام آفرید

 

مه و مِهر و ابر و فلک آفرید

بشر را مَلِک بر مَلَک آفرید

 

بلی لایق هر ستایش توئی

به دلهای بشکسته رامِش توئی

 

طفیلی دو عالم به سُبحانیت

رهین گشته خلقت به منّانیت

 

به درگاهت ار،دست حاجت کنم

ستایش تو را نی به جنّت کنم

 

من اَر رو به درگاه رحمت کنم

نی از روی مقبول حاجت کنم

 

که من عاشق بی قرار توأم

که مستم ز عشقت خُمارِ توأم

 

تو آن خالقی بگذری از گنه

که من فرق عصیانم و رو سیه

 

تو آن خالقی کان فضل و عطا

که من بندۀ غرق جُرم و خطا

 

تو آن خالقی معدن موهبت

من آن « عدلجو » غرق در معصیت

 

احد عدلجوی تبریزی

 

----------- متن اشعار استاد عدلجوی تبریزی ---------

حضرت امام زمان (عج)

 

عاشقم بیر، گوله، گوللر، گولودی

گول نه گول،گوللره بو سئوگلودی

 

گول نه گُل سَروین آلیر طاقتینی

سندیریب هر نه گولون قیمتینی

 

گول نه گول،وصفینه عاجزدی قلم

دونی رضوانه،هارا قویسا قدم

 

گول نه گول ،گوللره بو ، جان گتیریب

عارضینده مه تابان گتیریب

 

گُل نه گُل پرتو سبحان گتیریب

عالمین دردینه درمان گتیریب

 

گُل نه گُل بیر باخیشی جانی آلار

بیر تِلی عالم امکانی آلار

 

گُل نه گُل ،گون اوزونه بنده اولار

باخسا آی حسنونه شرمنده اولار

 

گُل نه گُل مهری ضیاءدن سالیری

گون اؤزی نورینی بوندان آلیری

 

گُل نه گُل باخسا گُله،گُل دانیشی

آلی مین یوسفی تک بیر باخیشی

 

گُل نه گُل زینت خلقتدی بو گُل

گُل دیمه گُللره زینتدی بو گُل

 

گُل نه گُل،گوندن ایشیق طلعتی وار

باغ جنّتده بونون شهرتی وار

 

گُل نه گُل عطرین آلان مست اولوری

حشره دین سرخوش و سرمست اولوری

 

گُل نه گُل عالمین حیثیّتی دی

ماسوا مقدمینون حسرتی دی

 

گُل نه گُل عارضی شبرنگ اَلور

گُلشن باغ جنان عطری گلیر

 

گُل نه گُل دللّر،اونا شایق اولوب

گؤرمه میش عالم اونا عاشق اولوب

 

گُل نه گُل حُسنده حُسن ازلی

دییر عالم بونا زهرا گؤزه لی

 

گُل نه گُل حُسنده بی همتادی

بو گُلون مشتریسی زهرادی

 

گُل نه گُل گلشن طاها گُلی دی

مرتضی اوغلودی زهرا گُلی دی

 

گُل نه گُل باغ پیمبر گُلی دی

فاطمه گوللرینون ، تَر گُلی دی

 

گُل نه گُل اون بیر امامین گؤزودی

بو گُله مشتری آللاه اؤزودی

 

گُل نه گُل زینت گلزار جنان

سولسا هر گُل ، بو گُله یوخدی خزان

 

گُل نه گُل ، «عدلجو» زهرا بالاسی

بو گلون جانیوه گَلسین قاداسی

 

 احد عدلجوی تبریزی

 

----------- متن اشعار استاد عدلجوی تبریزی ---------

شاهزاده حضرت علی اصغر (علیه السّلام)

 

سبک : من عبّاسم منه دریالر آغلار

 

من علی اصغرم باب الحوائج

هر چتین درده وار منده معالج

 

چاره سیز قالانلار- دردیلن یانانلار

سسلسون اورکدن- باب الحوائج

 

چرخ عزّ و شرف شهبازیم من

فاطمه اوغلینون هم رازیم من

 

هم گل گلشن گلزار عشقم

کربلا شاهینون سربازیم من

 

من همان اصغرم- همدل اکبرم

کوی عزّ و شرف- جانبازیم من

 

چاره سیز قالانلار- دردیلن یانانلار

سسلسون اورکدن- باب الحوائج

 

من علی اصغرم باب نجاتم

شیرخوارم ولی حیدر مثالم

 

چاره سیزلر منه دردین دیه لّر

من امام اوغلیم عینُ الحیاتم

 

من در حاجتم- چشمه ی رحمتم

کربلانون گل- طنّازیم من

 

چاره سیز قالانلار- دردیلن یانانلار

سسلسون اورکدن- باب الحوائج

 

من همان اصغرم چاتدیم مرامه

لشکر کفریلن چخدیم قیامه

 

قولّاری باغلی گلدیم کارزاره

دگدی اوخ حلقیمه گولدوم امامه

 

شه دیدی جان بالا- من دیدیم جان بابا

بولدی عالم حسین- همرازیم من

 

چاره سیز قالانلار- دردیلن یانانلار

سسلسون اورکدن- باب الحوائج

 

من همان اصغرم یوردوم ربابی

باغری قان ایلدیم اول دل کبابی

 

ایچمیشم اوز قانیمی دریا یانندا

تشنه دل ایلدیم شرمنده آبی

 

من علی اصغرم- بیرده سو ایچمرم

شاهیمون تشنه لب- سربازیم من

 

چاره سیز قالانلار- دردیلن یانانلا

سسلسون اورکدن- باب الحوائج

 

«عدلجویم» نه شان و شوکتیم وار

نه ریاست نه پول نه دولتیم وار

 

نیلورم منصب و جاه و جلالی

بسدی بو اهل بیته نصبتیم وار

 

«عدلجو» نوحه یاز- عالمه ایله ناز

سنده سویله حسین- سربازیم من

 

 احد عدلجوی تبریزی

 

----------- متن اشعار استاد عدلجوی تبریزی ---------

 شاهزاده حضرت علی اصغر (علیه السلام)

 

دنیایه قدم قویدی گل ناز حسینون

آچدی گوزونی خرداجا سربازی حسینون

 

روشن بو تولدن اولوب شهرمدینه

اولده ویروبلر بوگلی ام بنینه

اوپدی یوزونی ویردی صورا سرور دینه

گل آلدی گلون گولدی گل ناز حسینون

 

آغوشه آلوب تازه گلون سرورخوبان

باخدوقجا اوغنچه گلونه اولدی خرامان

گه اوپدی گوزون گه دوداقین گه بوغازندان

گوزیاشی آخوب اولدی عیان رازی حسینون

 

سویلوبدی علی سن گل ممتازحسین سن

حق عاشقی سن عاشق جانبازحسین سن

زهرا نوه سی خرداجاسربازحسین سن

کیم سن تک اولارعاشق جانبازی حسینون

 

بازار محبت ده متاعون اولی رایج

آزسنله اوغلوم اولاسان باب الحوایج

چوخلارسنیله دردینه ایلوله معالج

سنده اولی ظاهرکرم اعجازی حسینون

 

عشاق جهان عشقوه حیران قالاجاقدی

جنت ده ملکلرسنه لایلای چالاجاقدی

سندن چوخی اوز دردینه درمان آلاجاقدی

شهرت تاپاجاق خرداجا سربازی حسینون

 

اماآناسی دلخوشیدی تازه گلوندن

اصغرآدی دوشمزدی اومنزلده دلندن

بیرثانیه قویمازدی کناره گوز ایویندن

سویلردی دانش منله سرافرازی حسینون

 

بیردم گوزون آچ باخ منه ای گوزلری شهلا

نازایتمه منه نازیوه یوخ منده توانا

الله سنی پای ویردی منه ای گل رعنا

قورتاردی غمیم ای گل ممتازی حسینون

 

آرزیم بویدی اوغلوم اولاای گل رضوان

قربان کسم هر ایل بویناایلیم احسان

دامادایلیم اوغلومی ایللرگله مهمان

تازه گلین هردم اولا پیشوازی حسینون

 

چوخلار منه بوشهرده ایلردی شمادت

سسلردی اوغولسوزمنی ایلردی خجالت

یثربده اوجاتدون باشمی ای گل جنت

باشون اوجالا دهرده شهبازی حسینون

 

ای گلشن عمروم گلی وی سبط پیمبر

آچ غنچه لبون نازلی گلیم گول گوله گللر

بیرلحظه تبسم ایله دلشاداولا دللر

گل منله دله مرغ خوش آوازی حسینون

 

 احد عدلجو

منبع مجموعه کانالهای مدح و مرثیه

 

----------- متن اشعار استاد عدلجوی تبریزی ---------

مدح و میلادیه حضرت علی اکبر (علیه السلام)

 

عالمه گور نه گوزل گول ٬ گُلِ زهرا گتیریب

گول نه گول ٬ سرو چمن قامت طوبی گتریب

 

چمنِ عشقه بو گول ویرماقا پیرایه گلوب

ماه کنعان باخا بو حُسن دل آرایه گلوب

جدّی پیغمبر اکرمده تماشایه گلوب

هانسی زیبا بئله بیر حُسن مصّفا گتیریب

 

آیی مفتون ایلیور طلعت حُسنی گونی مات

گول اوزونده گورونور جدّی کیمی جلوۀ ذات

کیم باخیر حُسنونه پیغمبره یولّور صلوات

حُسنده جدّینه لیلا بونی همتا گتیریب

 

کیم ئوپور مست اولوری اَحمدی رُخساریندن

عطرِ طاهانی آلیر صورت گُلناریندن

یوسف حسرت ده قالیب گرمّیِ بازاریندن

هاردا یوسف بو قَدَر مشتری آیا گتیریب

 

یوسفون حُسنونه یوخ حُسن گوزه للر دیدیلر

گورسه یوسف بونی اَحسَن بئله بیر حُسنه دییر

تک بونون بیر تلی مین یوسفه قیمتده دَیَر

چون بو هرخصلت پیغمبری یکجا گتیریب

 

یوسفون حُسنی زلیخا گوزونه اولدی قَمَر

چکدی بازاره زلیخانی او ارزنده گُهر

او زلیخانی چکوب آردیجا بازاره اگر

باخ بونا گور نئچه مین آردیجا حورا گتیریب

 

دیمرم یوسفه بنزر بو مه برج کمال

هانی یوسف ده بو سیمای محمّد بو جمال

ساغ اوزونده دییه سن گولدی آچوب هاشمی خال

هاردا یوسف بئله بیر صورت زیبا گتیریب

 

دئمیره م یوسفه زیبا دَگی زیبادی ولی

بوناچاتماز او گوزه لدور بو گوزه للر گوزلی

اونا عاشقدی زلیخا بونا ذات اَزه لی

حق گوزللیقدا بونی یوسفه مولا گتیریب

 

هاجر اسماعیله فخر ایلر اولوبدور آناسی

شأنیده گرچه پیمبردی پیمبر آتاسی

بو حُسین بن علی اوغلودی زهرا بالاسی

هاردا هاجر بئله بیر احمدی سیما گتیریب

 

حُسنی آئینۀ طاها مَه کاملدی اوزی

نئجه مَه جلوده خورشیده مقابلدی اوزی

حُسن پیغمبَره بیر زنده شمایلدی اوزی

نه شمایل دئنه پیغمبری لیلا‌ گتیریب

 

سس دوشوب یثربه هر یئرده بو دلبر سوزودی

کیم باخیب گوزلرینه سویلدی طاها گوزودی

قاشلاری گوزلری سیماسی پیمبر اوزودی

حُسن پیغمبری بو حُسن دل آرا گتیریب

 

دلبر فاطمه گلدی گوره تا دلبرینی

آلدی آغوشه گولون گول، گول آچوب گوزلرینی

قویدی گول تازه گولون لبلرینه لبلرینی

دیدی هر بیر لبی مین چشمۀ احیا گتیریب

 

ائیلب اُپدی گولون ویردی حَسَن قارداشینا

گولی گول دن گول آلوب باخدی گوزه ل گوز قاشینا

ائیلیب اُپدی گوزون چکدی صورا ال باشینا

دیدی بَه بَه نه گوزل زلف چلیبا گتیریب

 

ائیلیب اُپدی حَسن ویردی ابوالفضله اودا

گولی آغوشینه تا آلدی گُل شیر خدا

قولارین بوینونا سالدی او مَه چرخ وفا

هانسی گلشن دیدی بیله گُل رعنا گتیریب

 

گُل لیلانی گُل اُمّ بنین اُپدی اودا

زینبه ویردی گولی آلدی گُل خیرنسا

دیدی آچ گوزلرون عمّه ن اولا قربان بویووا

هانسی زیبا بئله بیر دیدۀ شهلا گتیریب

 

ای گوزه للرگوزلی ای گُل گلزار اِرم

بُلوسن عاشقیووم عاشق شوریده سَرم

«عدل جویم» قاپوزون نوکریم ایله کَرَم

اوز قویوب درگهوزه دلده تمنا گتیریب

 

 احد عدلجو تبریزی

 

----------- متن اشعار استاد عدلجوی تبریزی ---------

 در ولادت حضرت فاطمه زهرا (سلام الله)

 

توجه !

هرمداح یا روضه خوانی از اشعار ما استفاده کند و

تخلصش را نخواند ما راضی نیستیم.

 

حق فاطمه نی عالمه زیور یارادوبدی

پیغمبره دل حیدره دلبر یارادوبدی

 

خلاق جهان خلق ائلین وقته جهانی

زهرانی حیا گنجینه گوهر یارادوبدی

 

فرض اولسا اگر جمله عَرَض عالم امکان

زهرانیده الله اونا جوهر یارادوبدی

 

مریمله قیاس ائتمه جلالتده بتولی

حق فاطمه نی مریمه سرور یارادوبدی

 

هاردان اولی بیر پایه ده عیسائیله احمد

الله مگر عیسایه ده کوثر یارادوبدی

 

جز فطمه،کس کوثره مصداق اولا بولمز

الله اونی تک،کوثره مصدر یارادوبدی

 

اولمازدی علی کفوی جهاندا اودور الله

مولایه باخوب بیر بله همسر یارادوبدی

 

هرچند خانم تک گل طاهادی ولیکن

الله اونی پیغمبره مادر یارادوبدی

 

هئچ گل گل طاهایه گوزلیقدا یتیشمز

حق فاطمه نی گللره زیور یارادوبدی

 

هُم فاطمه بحثنده قالوب چوخلاری عاجز

بو جمله ده حکمت حق داور یارادوبدی

 

پیغمبری الله ئوزی زهرائیله سایموش

هرچند اونی عالمه رهبر یارادوبدی

 

زهرانون آدیلا پَر آچور گویده ملکلر

زهرا آدین الله اولارا ، پَر یارادوبدی

 

خلقتده باخوب فاطمه نون شأننه الله

زینب تک اونا شیرزن نَر یارادوبدی

 

بو رسمدی ئوز همسرینه فخر ائدر عورت

چون همسرین الله اونا مفخر یارادوبدی

 

مجموعه ی خلقتده فقط زینبی الله

فخریه عبدالله، جعفر یارادوبدی

 

حق گرچه علینی یارادیب ساقی کوثر

زهرانی گینه ساقیه ساغر یارادوبدی

 

ئوز شأننه لایق خانمین خالق عالم

خلقتده باخوب همسر، حیدر یارادوبدی

 

الله گلی هر چند ائدیب زینت خلقت

زهرانی او گل دنده معطر یارادوبدی

 

زهرائیله سجاده یه زینت وئریب الله

تسبیح و مناجاته ده زیور یارادوبدی

 

زهرانی نه تک یئرلره زینت وئروب الله

اون بیر پارالاق اولدوزا محور یارادوبدی

 

بی فاطمه هر منبر اولا ارزشی یوخدی

زهرا آدینی زینت منبر یارادوبدی

 

الله خانمی تحفه وئریب جان جهانه

مین مریم وسارایه برابر یارادوبدی

 

زهرا هارا مریم هارا مین آی گونه چاتماز

الله کیمی گور شافع محشر یارادوبدی

 

بی عشق خانم«عدل جو»دنیا،نیه لازم

الله خانمی دللره دلبر یارادوبدی

 

احد عدل جو تبریزی

 

----------- متن اشعار استاد عدلجوی تبریزی ---------

در ولادت حضرت فاطمه زهرا (سلام الله)

 

تا قویدی قدم عالمه آلاله ی عالم

عالَم گل آچوب طلعت زهرانی گورنده

 

بیر ایله کرامات و فیوضاتیله خورشید

گیزلتدی ئوزون صورت زهرانی گورنده

 

مهتاب او قدر کوکب رخشانیله گویده

شرمنده اولوب طلعت زهرانی گورنده

 

طوبا او گوزل حسنیله اول سرویله یکسر

قدین خم ائدوب قامت زهرانی گورنده

 

بیر ایله جلال و او قدر شأنیله مریم

تعظیم ائلدی حضرت زهرانی گورنده

 

حاتم که او دولتله اولوب شهرهٔ عالم

آچدی الینی دولت زهرانی گورنده

 

مین شوکت و اجلالیله حوران و ملائک

تپراقه دوشوب شوکت زهرانی گورنده

 

نسوان بهشتی که اولوب مظهر عفت

شرم ایله دیلر عفت زهرانی گورنده

 

جبریل امین و ملکوت اهلی سماده

حیرتده قالوب عصمت زهرانی گورنده

 

بسکه واریدی کینه سی نسوان یهودین

دوزمزدیله شخصیت زهرانی گورنده

 

یوخدور دئدیلر فاطمه نون تازه لباسی

شرمنده اولار خفت زهرانی گورنده

 

دعوت ائلیوبلر خانمی مجلس جشنه

دلشاد اولالار خجلت زهرانی گورنده

 

حق اولمادی راضی اولا زهرانی خجالت

عرشیم تیتیرر ذلت زهرانی گورنده

 

گوندردی خدا فاطمه یه جامه ی جنت

شاد اولدی نبی خلعت زهرانی گورنده

 

گئیدی خانم اول جامه لری گئتدی او جشنه

یئر عزت آلوب عزت زهرانی گورنده

 

یئر،گوی خانما فخر ائلیوردی یریدوقجه

تیتروردی زمین هیبت زهرانی گورنده

 

تا قویدی قدم مجلسه انسیه ی حورا

غش ایلدیلر زینت زهرانی گورنده

 

یازمیردی قلم،ائتدی دعا «خادم آذر»

خامه م دل آچوب رأفت زهرانی گورنده

 

احد عدل جو تبریزی

 

----------- متن اشعار استاد عدلجوی تبریزی ---------

 شاهزاده حضرت علی اصغر (علیه السلام)

 

جهان جنانه دونوب بیرگل اوزلی دلبردن

مدینه روشن اولوب شمع روی اصغردن

 

ریاض فاطمه بیرگل ویروب نه گل نجه گل

آلوبدی عطروطراوت تمام گللردن

 

نه گل جمالینه مفتون اولوبدی ملک وملک

گوزلدی گوزلری جنتده کی گوزللردن

 

نه گل سمالره زینت ایدوبدی ذات احد

اودورمعطرایدوب هرگل معطردن

 

نه گل طبیعتی الله چکوبدی تصویره

جمالی آئینه دورطلعت پیمبردن

 

نه گل جمالینه گللر گلوب تماشایه

ایدوبدی مهری خجالت جمال اظهردن

 

نه گل ستاره لری جلوه دن سالوب نوری

جمالی باج آپارورمهروماه انوردن

 

نه گل نهانیدی هربیرلبینده چشمه جان

ئولونجه مست اولی هرکیم اوپه اولبلردن

 

بهشت گللری چاتمازبوناگوزلیقدا

گوزلدی حسنی بونون گویده کی ملک لردن

 

ویروبدی تللرینه شانه دست قدرت اوزی

فرشته لراوزونی آسلیوب اوتللردن

 

حسین منزلینه رشک ایدرریاض ارم

که اوردابیرگل آچوب مشک بوی عنبردن

 

رباب بیرتلینه ویرسن عالمی ویرمز

آسار مین عالمی بیرتارموی اصغردن

 

قویاردی صورتینه صورتین اوپردی گوزون

دیردی دویمورعلی گوزلریم بوگوزلردن

 

دیردی بیرباخشین کونه ویرمرم بالامین

ولیک آلدی اونی حرمله اومضطردن

 

ایوین داغیتدی ربابین سه شعبه بیراوخولان

ئولونجه خوش گونی آلدی اوغملی مادردن

 

صغیرباب الحوائجدی (عدلجو) بوبالا

ئولونجه ئوزمه الون آستان اصغردن

 

عدلجو

منبع مجموعه کانالهای مدح و مرثیه

 

----------- متن اشعار استاد عدلجوی تبریزی ---------

 وصیت حضرت زهرا (سلام الله) به

 حضرت زینب (سلام الله) 

 

زینب ای فاطمه نون بنزری سیماده قیزیم

منه حسرتله باخوب گَلمه بیله داده قیزیم

 

توکمه گوزیاشیوی قربان او گوزل گوزلریوه

اوتی باهم دانیشاق مشتریم سوزلریوه

 

حیف اولا قارخمور الیم شانه وورام تِللریوه

قنفذون قمچیسی ایلوب منی افتاده قیزیم

 

گَۀ قیزیم آغلاما سنسن آناوین نائبه سی

من اُلندن صورا سنسن بو ایوین فاطمه سی

 

سن بو گوندن اولاجاقسان ننه سیزلر ننه سی

اوزیوی ایت آنا اولماقلیقا آماده قیزیم

 

سن منیم جانشینیم نام و نشانیم بالاسان

آناوین ایمدی گرک اُلسه یرین سن آلاسان

 

ایش بیله دوشدی قیزیم سنده آناسیز قالاسان

آغلاما گَلمه بیله ناله و فریاده قیزیم

 

بیرده مندن صورا بو ایو دونی بین الحزنه

ویر تسلّی بو چتین وقته شه ممتحنه

 

آنالیق ایله اوزون مظلوم حسین و حسنه

من اَُلندن صورا قویما گَله لر داده قیزیم

 

آناوین ساغر آمالی قیزیم دولمیه جاق

هیچ گلستاندا منیم تک گُل آچوب سولمیه جاق

 

بُلورم مجلس ترحیمه گَلن اولمیه جاق

سن اوزون اوخشا منه بیت غم افزاده قیزیم

 

قویما مندن صورا قلبین آتاوین غملر آلا

آخشام اولجاق چراغین یاندور ایوینی نازلی بالا

 

یاری الدن گیدنی قویما قرانلوقدا قالا

تسلیت ویر آتاوا بو غم عُظماده قیزیم

 

هله صاقدور بو آنان ایمدیدن آز ایله ملال

بوینی چیگنینده گَزوب آز منیم آرامیمی آل

 

آغلاما گَل بالاجا اللریوی بوینوما سال

خرمن صبریوی ویرمه بو قدر باده قیزیم

 

منه هله اُلمه میشم توکمه بیله گوزیاشیوی

سیل گوزون، آغلیوب آغلاتما حسین قارداشیوی

 

گَل قیزیم قوی یارالی سینمین اوسته باشیوی

اُلمه میش یات بو گئجه سینه ی زهراده قیزیم

 

منیم اُلماقلیقیما ایلمه چوخ سوز و گداز

آناوین منشی تقدیر یازوب عمرینی آز

 

بیله فکر ایله آنان چوخدان اُلوب ای گُل ناز

یورما چوخ اوز اوزیوی گَلمه بیله داده قیزیم

 

یوخدی بو فانی جهاندا اُلومه چاره یازان

یارانان اُلمه لیدی آغلاما ای جانیمه جان

 

ایمدیده اُلمه سه بیر گون اُله جاقدور بو آنان

چاتمیوب هیچ کیم اوز آمالینه دنیاده قیزیم

 

من بو ایوده غم الیندن بالا دویدوم جانه

دفتر عمریمی ویردیم غمیله پایانه

 

نه حنا زلفیمه قویدوم نه ده ووردیم شانه

شانه وورسان تِلیوه سال منیده یاده قیزیم

 

سنه بو ایوده قیزیم سینه گُلی باغلامادیم

طوی گونونده آنالار تک بوییوی اوخشامادیم

 

نسگل اولدی سنی من بخت ایوینه یولّامادیم

حسرتیم قالدی اُلونجه بو تمنّاده قیزیم

 

مطلع شعری دیوبدور منه بیر شخص جمیل

اوزی مدّاح حسیندور، آدی میرابی جلیل

 

اودی بو نوحه لرین یازماقنا اصل دلیل

عدلجونی گَتیروب شوره او آزاده، قیزیم

 

استاد عدلجوی تبریزی

منبع مجموعه کانالهای مدح و مرثیه